Shillong, Rymphang 14 : U Myntri ka Tnad Public Health Engineering (PHE) Marcuise N Marak ha ka sngi Balang ula ong ba Jal Jeevan Mission (JJM) ha Meghalaya ka dei kaba la pyntreikam haba shit haba shai bha.
Haba iakren bad ki nongthoh khubor, u Marak ula ong “Lada iakren hi, ka jingpyntreikam ia ka JJM ka long kaba shai bha hangne”.
Haba kyntait ia ki jingkynnoh bamsap, u Myntri ula ong “Phin ioh ia ki bill jong phi hadien ba phi la pyndep ia ka kam. Ka kynhun third party ka don ban ai kaiphod ba ka JJM ha kata kata ka Shnong ka dei kaba la pyndep, ka um kala tuid bha bad ki briew kila sdang ban ioh um…dei hadien kane ba ia ki bill la phah ban siew. Ka jingsiew ruh ka don da ka lynti”.
U iathuh ba ka Meghalaya kala kynjoh ia ka 74.47 % ka jingpyndep ia ka JJM ban ai kor um iing sha palat 4.85 lak tylli ki Longiing.
“Kaei pat ka jingeh jong ka BJP, nga te ngam tip re? kan dei ka kam kaba rit namar ngi pyntrei da ki hajar tylli ki Iing bad ngi dang pyrshang ruh kat kaba lah ban pynbeit ia ki jingduna” ula ong.
U Myntri ula ong “Dang shen ki kynnoh ba ka don ka jingbamsap hynrei ka jingshisha hi ka long ba kam don. Ka project kala slem namar ka mih ka jingpynthut ha ka por ba sdang pyntrei ia ka kam. Ban ioh sdang biang, kala shim por ia ngi bad hadien ba ngi la dep pynbeit, ki kam kila iaid shaid shaid. Kumta, kam don satia ka jingduna na ka liang ka Tnad bad ka Sorkar”.
Hynrei ula ong ba ki don katto katne ki project kiba slem namar ka jingbym ioh bording elektrik. Ki don shibun ki jingeh ba iatakhuh bad ka jingbym ioh bording.
