Ka jhamela kali Tourist | Dawa ka MRTF ia ka Committee ban ai kaiphod hapoh 6 bnai | Ka Sikkim model kam iahap ha Jylla

Shillong, Risaw 07 : Ka Meghalaya Rural Tourism Forum (MRTF) ka la kyntu ia ka sorkar jylla ba ka dei ban pynthikna ia ka Committee ba dang shu thaw dang shen ban peit ia ki jingeh jong ki Tourist taxi bad kiwei pat ki kynhun ba don bynta ha ki kam jngohkai pyrthei, ba ka dei ban aiti ia ka kaiphod ba khatduh hapoh ka 6 bnai.

Ia kane ka rai la shim ha ka jingialang ba kyrkieh jong ka MRTFmyn ha ka 30 tarik Nailur, 2024, kaba iakren halor ka jingpynbna ba dang shen jong ka Meghalaya Khasi Tourist Taxi Association (AMKTTA) ban khang ia ki kali Tourist na Assam ba kin kit ia ki nongshangkai sha ki jaka jngohkai pyrthei bapher bapher ka Jylla.

Ki dkhot jong ka MRTF ki kynthup bun eh na ki kynhun ba don bynta ha ki kam jngohkai pyrthei ha ryngkat ki Khlieh Nongsynshar Shnong, ki Nongmihkhmat na ki seng bad society bapher bapher kiba trei ia ki kam jngohkai hapoh ka Jylla.

Haba phah ïa ka rai jong ka lyngba ka shithi sha u Myntri kam jngohkai bah Paul Lyngdoh ha ka sngi Nyngkong, u President ka MRTF Bah Alan West Kharkongor u la ong, “(Ngi la pynbeit lang da kawei ka sur ïa kata) ha ka Committee ba la pynbna da u Myntri Rangbah ka Jylla ban peit ïa ka jingeh jong ka AMKTTA, ki dkhot/ki nongmihkhmat jong ka MRTF, MTDF, TOAM, SRTA, FOSH,JTES, bad kiwei kiwei, ban pynrung kum ki kynhun ba don bynta ha ki kam jngohkai, ba dei ban ailad ia ki ban long ki dkhot jong ka Committee. Ka Committee….ka dei ban aiti ia ka kaiphod ba khatduh sha ka Sorkar hapoh ka hynriew bnai”.

“(Ngi) kyrpad ruh ba ka Committee ba la thaw da u Myntri Rangbah ka Jylla, kan pynrung ïa kiwei pat ki kynhun ba don bynta ha ki kam jngohkai pyrthei kum ki dkhot” u la bynrap.

Ka MRTF ka la ong ruh, “(Ngi) sngewthuh ba ki dkhot ka AMKTTA ki don ka hok ban kamai jakpoh hynrei ka lynti ba ki shim ban pynsangeh ïa ki kali kamai kiba don ïa ki kot ki sla kiba biang ban ïaid hapoh ka Jylla Meghalaya, kam dei ka lynti kaba ki dei ban pyndonkam namar kane kan wanrah ïa ka jinghiar jong ka kam jngohkai pyrthei ha ka Jylla bad kan ktah jur ïa ka ïoh ka kot .”

“ Ngi shem ba ka jingleh jong ka AMKTTA ban khangia baroh ki kali Tourist ba register ha Assam ban leit sha ki jaka jngohkai pyrthei bapher bapher jong ka Jylla ka long kaba ieng nongrim satia bad ka dei ka jingpynkhein ia ka Article jong ka Riti Synshar ka Ri India hapoh ka hok longtrei bad ka jinglaitluid ban leh ia ki kam khaii pateng hapdeng ki Jylla” kala bynrap.

Haba pynpaw ba Sikkim model (lynti ba shim da ka Sikkim) kam long kaba lah ban leh kumjuh ha Meghalaya, u Bah Alan ula ong “(Kane ka long namar ba) ka Sikkim ka dei ka Jylla bym don jaka mih bad ka jaka kaba la iada bad don ia u khappud bad kiwei ki Ri. Ka Jylla jong ngi ka dei ka Jylla kaba ki nongshongshnong jong kiwei ki Jylla kum ka Tripura, Mizoram bad Assam ki ïaid lyngba, bad kumta ka jingpyntreikam ia ka Sikkim model kan wanrah ia ki jingeh ha ka leit ka wan jong ki briew na kiwei pat ki Jylla”.

Nalor kane, u President ka MRTF u la ong ba baroh ki Khlieh Nongsynshar, ki Sirdar, ki Rangbah Shnong ki ailad ia baroh ki kali tourist ia ka hok kaba mar katjuh ban rung bad pynieng ia ki kali jong ki ha ki jaka jngohkai pyrthei bapher bapher bad kim shym la ai ruh ia kano kano ka jingleh kyrpang ia kino kino ki seng ne ki kynhun briew.

“Kane ka jingpynbeit ka la ieng ha ka jingtynjuh jong ka por namar ba ka long kaba leh khlem shah liang bad ba niew kumjuh ia baroh bad kumta kane kan iai bteng” ula ban jur.