Shillong, Risaw 07: U Myntri Sorkar bad MLA ka Pynthorumkhrah Bah AL Hek hynne ka sngi Nyngkong, u la pyntip ba iaka jingkieng hajan ka BDW International School ha Nongmensong yn pyndep noh hapoh ki 4-5 bnai.
“Nga la dep khot ïa ki engineer hynnin ka sngi (Sngi U Blei) bad baroh kila wan lang sha katei ka jaka bad ngi la dep pynbeit hynrei ïa ka jingkieng ym pat dep. Ki thmu ban pyndep ia ka kam hapoh ki 4-5 bnai ban wan” ong u Bah Hek haba kren sha ki lad pathai khubor.
Dang shen, ki pulit pynïaid kali jong ka nongbah Shillong (STP) ki la pynpaw ha ka social media, “Ka jingkieng kaba dang shna thymmai hajan ka BDW International School ka la mih ki jingorpait kiba paw bad kam long shuh kaba bit ban ïaid ki kali. Ban pynthikna ïa ka jingshngaiñ jong ki nongleit nongwan, la khang shipor ïa ka surok.”
Haba kylli, u Bah Hek u la ong ba ka jingorpait kam dei ka jingkieng hynrei kadei ka bynta jong ka nala um.
“Mynta ka sngi, nga la iakren bad u heh engineer, ki engineer bad ki SDO ban pynthikna ba yn mang pisa mardor ban pyndep iaka jingkieng namar kane ka surok ka long kaba kongsan bha bad kaba donkam kyrkieh ban maramot biang” u la ong.
