Shillong, Jymmang 20 : U Myntri Sorkar bad Working President ka NPP Marcuise N Marak ha ka sngi Balang ula ther kylla ia u nongialam ka BJP bad MDC ka Tura Bernard N Marak halor ka jingkam ba u Myntri Rangbah Conrad K Sangma u don ka jingiadei ba iajan bad u MLA barim Esmatur Mominin kaba long ka daw bah halor ka jinglait jamin jong u.
Haba shim ia kane ka jingkynoh “ ka bym lah ban pdiang da lei lei ruh”, u Marcuise ula ong ba ka Executive ne ka Sorkar kam don bynta eiei ha ki rai jong ka Judiciary ne Iingkashari.
“Kumta, ka jamin ka dei kaba ai da mano?, Hato dei u Myntri Rangbah ba ai jamin?. Em, ym dei u Myntri Rangbah, ka jamin ka dei kaba ai da ka Iingkashari” ong u Marcuise haba iakren bad ki nongthoh khubor.
“Kumta balei u Barnard um kylli ia ka Iingkashari ba ong ba u Myntri Rangbah ula iarap. Ka long kaba khlem nongrim suda. Ka dei ka jingkren ka bym lah ban pdiang. Ka jingkynthoh ka dei tang ban ialam bakla ia u paidbah”.
Ula kdew ia ka jingphiah ia ka bor treikam hapdeng ka Executive bad ka Judiciary kumba la pruid dak ha ka Riti Synshar.
“Ha ka riti synshar paidbah jong ngi, ka Executive, Judiciary ki dei ki bor treikam kiba trei la la ki jong ki kam. Kat kum ka riti synshar, ka Judiciary kam sngap ia ka Executive”.
Haba kdew ba ka Sorkar Jylla ruh kala iakhun pyrshah ia ka mukotduma ha Iingkashari, ula ong “Wat ngi ruh ngi don bun ki mukotduma ba dang sahteng ha ki Iingkashari ia kaba ngi la iakhun pyrshah hynrei u Barnard Marak ula kynnoh ia u Myntri Rangbah ba u iarap ia u namar ka jingioh jamin”.
“Kane ka dei ka bym pdiang, ka ba ialam bakla naba ka dei ka judiciary kaba la rai ban ai jamin” ong u Marcuise.
