Shillong, Rymphang 20: Ka Myntri ka tnad Agriculture & Farmers’ Welfare ka Kong Ampareen Lyngdoh hynne ka sngi Baar, kala ong ba ka Geographical Indication (GI) Tag kaba la ai ia u Shynrai Lakadong ka ieng ban iada ia ka jinglong trai bad tynrai jong ka rukom pynmih bad ka jingnang jingtip ban pynthikna ba tang ki nongrep bad ki nongthung katei ka thaiñ ne Geographical Area, kiba lah pyndonkam ia ka GI tag.
“Ka dei ka Tag ne ka shap kum ka jingpynithuh ia ka hok long trai bad ban lah pyniaid iew bha ia ki mar bad ki nongdie ba kin lah ban pyniapher ia u mar ha ki iew ki hat” ong ka Kong Ampareen Lyngdoh haba jubab ia ka zero hour notice kaba la wanrah da u MLA ka VPP na Nongkrem u Bah Ardent M Basaiawmoit hapoh ka iing dorbar.
Hadien ba la pynlong bunsien ia ka jingsngap ia ki jingpynsngew bad ki jingpynshai, ka Registrar jong ka GI ha Chennai kala pynmih ia ka jingpynbna ba la ai ia u GI Tag nombar 741 ia u shynrai Lakadong na East Jaintia Hills bad West Jaintia Hills District ha ka 29 tarik u Naiwieng 2023.
Ia katei ka aplikeshon la phah da ka Lakadong Turmeric Cooperative Union Limited, Jowai lyngba ka jingkyrshan lang jongka Directorate of Horticulture, Department of Agriculture & Farmers Welfare.
Ka Kong Ampareen kala pyntip ba bun jait ki nongthied kila don bynta ha kaba thied ia u symbai Lakadong na ka bynta ban thung bad ban pynmih ha ki jylla jongki bad kumjuh ban die ia u kum u ‘Lakadong Turmeric’ bad kane kala pynklumar khlieh ia ki nongthied bad pynthohbria iaka dur ka jingbha bad iaka jinglong kyrpang jongu shynrai Lakadong. Kumta kane ka lah ban pynduh noh ia une u mar bad ka jingduhnong kaba khraw ha ka ioh ka kot jong ki nongrep Lakadong.
“Da kaba shimkhia ia kane ka mat, la pynmih ia ka notification da ka tnad bad la mana jur ban die ia u symbai Lakadong na ka bynta ban pynmih ia u shabar jongka rilum Jaintia,” kala ong bad ka bynrap ba kine ki jingtuklar kila iarap shibun ban kyntiew ia ka jingrep ia u Lakadong da 13 shah ia ka jingdon ki nongrep ha ka kam rep Lakadong.
Kane ka jingshimkhia ka long kaba iaid ryngkat lang bad ka jingangnud jong ki nongrep ban kyntiew arshah ia ka jingioh ka jongki bad ban plie lad ia ki nongrep ban buh dor hi ia u shynrai Lakadong.
“Kumta ka long kaba donkam ban iada ia ka jinglongtrai ia u Lakadong bad ban ai jingmyntoi ia ki nongrep ia kaba ka sorkar kala shim ia ki sienjam kat kiba lah” kala ong.
Nalor kane, ka Kong Ampareen kala ong ba ka sorkar Meghalaya ka iengskhem ha kaban kyntiew bad ban pyniaid iew ia une u jingthung uba mih napoh ka jylla bad kan iaid shakhmat ruh ha kaban pynioh ia ka GI Tag na ka bynta kiwei kiwei ki mar ruh.
“Kane kan plie lad ia ka jylla ban pynmih ia kiei kiei kiba long tynrai ban tyrwa ha ki rynsan kiba don ha kylleng ka pyrthei kaban iarap ban kyntiew ia ka ioh ka kot jong ki nongrep bad ban kyntiew ia ka ioh ka kot ha ka Imlang sahlang” kala ong.
