Nongstoiñ, Risaw 3: Naduh ba la plie ïa ka Don Bosco Technical School ha Pyndenglawar West Khasi Hills kaba don ha shilliang jong ka surok Nongstoiñ-Shillong, da ki spah ngut ki samla kynthei bad shynrang ki la ïoh jinghikai pyntbit ha ki kam bapher bapher bad ka la long ka jingmyntoi kaba khraw na ka bynta ka lawei jong ki na ka bynta ban ïeng ha la ki kjat ban kyntiew ïa ka ïoh ka kot, ka kamai kajih bad ban kyrshan ïa ka lawei ka jingim jong ki.
Ia kane ka jaka hikai la sdang ban tei ha u snem 2016 bad la lah ban pyndep ha u Nohprah jong u snem 2017 bad la pyniaid ia ka jingshakri jong ka ha ryngkat ka jingïatreilang bad ka Construction of Indian Council, hynrei katei ka Council ka la leit phai noh hadien kumba lai bnai ei ei.
U nongthoh khubor Ka Shlem haba ïakynduh ïa u Rev Fr. T.Nonglang Director jong katei ka jaka ai jinghikai, ula iathuh ba ki don da ki spah ngut ki khynnah shynrang bad kynthei kiba la dep shah pyntbit ha katei ka jaka ha kiba bun jait ki kam katkum ka jingkwah jong ki ban trei.
U la ïathuh ba ha katei ka jaka la ai jinghikai ïa kiba bun bah ki jait kam kum ka welding, misteri dieng, mechanic shna kali, suh bad thaiñ jaiñ, Computer Course bad ka don ruh ka thong ban ai jinghikai ha ka rep ka riang.
Kaba kham sngewtynnad ka long ba kham bun na ki khynnah kiba wan shah pyntbit ha katei ka jaka ki dei ki bym don lad shuh ban bteng ïa ka jingpule na ka daw jong kiba bun ki jingeh ba ki ïakynduh.
Hynrei na ka daw ba ki don ka jingangnud ban ïeng ha la ki kjat, kim shym la pynsep ei ïa ka por ka jong ki bad ka jingtrei shitom kyrmen skhem ba kan long ka jingkyrkhu kaba khraw ia ka lawei ka jingim jong ki.
U Fr. Nonglang u pyntip ba ka jingai jinghikai ka dang iaid shaphrang dang ha kine ki khyndiat snem. Hynrei u kyrmen ba katba nang iaid ki sngi ki por, kane ka jaka ai jinghikai ym tang ba kan shlei da ki samla kiba angnud ban ieng ha la ki jong ki kja pynban kan lah ruh ban ai ia ki jait jinghikai bapher bapher bad ka thong ka long ruh ba ha kawei ka sngi yn ryngkat kyrdan bad ka Don Bosco kaba ha Shillong.
Ha katei ka jaka hikai ki don ruh ki jaka sah kiba biang bha na ka bynta kito kiba wan shah pyntbit ha ki kam bapher bapher ba kynthup ïa ki jaka sah jong ki khynnah shynrang bad kynthei.
Na ka liang u Rev Fr Nonglang u la ïathuh ruh ba na ka bynta kiba wan sah ha katei ka jaka ka bai sah bad bai bam ka long ar hajar phra spah shi bnai.
U la ïathuh ruh ba naduh ba sdang ka lockdown, ki khynnah kiba wan shah pyntbit ki la kham duna hynrei kiba la dep wan shuwa ka lockdown ruh ki dang don bad kiba dang wan hadien ruh ki dang don.
