Shillong, Iaiong 08: U Myntri Sorkar bad nongialam ka BJP Bah Sanbor Shullai u la pynpaw ia ka jingsngewskhem ba ka BJP kan wanphai bad bat ia ka bor synshar hapoh ka Jylla Assam, da kaba pynpaw ba u Himanta Biswa Sarma un bteng biang kum u Myntri Rangbah.
“Ka BJP kan wanphai bad bat biang ia ka bor synshar ha Assam bad u Himanta Biswa Sarma un wanphai bad bteng kum u Myntri Rangbah ka Jylla Assam. Kata kam don jingartatien” ong u Bah Sanbor haba kren halor ka elekshon sha ka iingdorbar thawain ka Jylla Assam.
Haba kyntait ba kan don ka jingpyrshah Sorkar haka elekshon ban wan, u Bah Sanbor ula ong “Kam don ka jingpyrshah Sorkar hapoh ka Jylla Assam.”
Haba pynpaw ba ki paidbah ki poi bun bha haki jingialang elekshon, u nongialam ka Meghalaya BJP ula ong “Da kaba pynshong nongrim iaki jingtip bad jingïalap elekshon bad ka jingkyrshan jong ki paidbah ha man la ki program ialap elekshon, u Himanta Biswa Sarma bad ki nongïalam ka BJP na Delhi shano shano ruh ba ki ïalap elekshon, phin ïohi ba da ki lak ki briew ki wan. Kane ka pyni ba ki briew ki wan namar ba ki la rai ban kyrshan iaka BJP”.
