Shillong, Jymmang 14: Ka kynhun ki runar ki bym lah ban tip ki dei kiei, kila jynrat bad rong tuh ia bun tylli ki diengphna lum jingtep napoh ka Lum Jingtep jong ka Balang Catholic kaba don ha Tura.
Kat kum ka khubor Pulit, la iathuh ba ki runar kila jynrat haduh 19 tylli ki diengphna ba shna da ki nar na ki lum jingtep briew bad pynjulor haduh 15 tylli na ka jingpyrshang ban jynrat.
Ki Pulit ki iathuh ba kane ka jingjia kala jia ha u Lum Jingtep ka Cathedral Parish kaba don ha R.C Road, Tura (marjan ka Iing Bishop).
Hynrei ki Pulit ki iathuh ba ki runar ha kane ka jingiajynrat ia ki diengphna, kila iehpat shadien khlem da ktah ia kiba shna da ka lyntang.
Ki Pulit kila ioh pdiang ia ka ejahar halor kane ka jingjia bad ka jingtohkit mynta kala iaid shakhmat.
Ki Pulit ha ka jingtohkit kila ioh kurup noh ia 8 tylli ki narphna na ka jaka pyllang tiar jot kaba don ha Chandmari, Tura.
Ki briew kila trei ha kane ka jaka kila pyntip ba arngut ki samla shynrang kila wan da ka Auto rickshaw bad pyntip ba kila weng noh ia kine ki narphna ba rim ban bujli da kiba thymmai.
Ki pyntip ba kine ki runar kila ioh haduh T.2200 na kaba die ia kine ki narphna.
