Shillong Nohprah 02: U Symbud Myntri Rangbah ka Jylla ba khmih ia ka tnad PWD (R&B) Bah Prestone Tynsong ha ka sngi Nyngkong, ula ong, ba kam long kaba iahap ban shu kynnoh beit thik tang ia ki kompani ne kontraktor halor ka jingslem ban shna ia ka surok Shillong-Dawki namar ka jingdon kiwei ruh ki jingeh kiba dei ki daw.
“Ngan ym kynnoh beit thik tang ia ki Kompani, Kontraktor ne NHIDCL hynrei kila mih bun ki jingtynjuh khamtam eh ha kaba iadei bad ka jingeh ban ioh jaka bad kane kala pynmih ia ka jingpynslem” ula ong hadien ka jingwan jurip ia ka jingshna ia ka surok na Umshyrpi shaduh Dawki hynne ka sngi.
Ia u Symbud Myntri Rangbah la synran da ki bor pyniaid district, ki heh ophisar sorkar, NHIDCL, Kompani, Kontraktor bad ki nongialam shnong na ki 10 tylli ki shnong.
“Lada phi peit ia ka Package I naduh Umshyrpi haduh ha PHC Pomlum, ka jingeh kaba mih ka dei na ka jingpynkyrniah ia ki post elektrik bad ki pipe um bad u pipe ym dei satia uba rit hynrei u dei uba heh bad kam long kaba suk ban pynkynriah” ong u Bah Prestone Tynsong.
Ula iathuh ba ha ka thain 101 Area, lah iakren bad batai ba kin sdang noh ban pyniasoh ia ki pipe um kaba sah sa 170 mitar bad lah iakren ruh ba dei ban pyndep ia ka jingpynkynriah ia ki post elektrik hapoh une u bnai bad u kontraktor ka Package 1 ula kular ban shna pyndep ia ka surok hapoh ka 31 tarik mynta u bnai khnang ba ki paidbah kin iohi noh ba ia ka surok Four Lane lah dep nadong shadong hapoh ka 31 tarik u Nohprah mynta u snem.
Ula iathuh ruh ba ki kam ki jam kila iaid shakhamt ha kaba iadei bad ka Package II naduh na Mylliem Marbaniang ter ter shaduh Wahlyngkhat bad ka Package IV ka sdang na Pynursla Civil Sub Division shaduh sha Lad Wahkdait bad na Bypass Wahkdait shaduh sha Dawki kaba dei ka Package V.
“Ngi lah pynbor ba ki dei ban pynsted ia ka kam bad ban pynbun shuh shuh ia ki nongtrei khnang ba yn lah ban pynurlong ia ka thong jong ka Package II, 1V bad V ban pyndep hapoh ka 31 tarik u Nohprah 2026” ong u Bah Prestone.
“Ha ka jingjurip, ngi la shem ruh ba kala don ka jingsniew palat jong ka surok Single Lane naduh na Wahkdait shaduh Dawki bad kumta ngi la shim ia ka rai ba ka PWD kan aiti noh mardor ia ka DPR ban shna bha ia ka surok bad kin don ki jaka kaba ngi lah ban kham pynheh” ula bynrap.
U Bah Prestone ula ban jur ruh ia ka jingdonkam ban pynitynnad ia ka Jingkieng Dawki, ka jaka kaba pawnam bad ba khring bha ia ki nongjngohkai pyrthei na kylleng ka ri India bad ki ri ka pyrthei. U pyntip ba ka Tnad kala pynkhreh ia ka DPR halor kane bad la buh thong ban pyndep ia ka hashuwa u Iaiong 2026.
Ha kaba iadei bad ka jingshna ia ka jingkieng ha shnong Nongpdeng, u Bah Prestone u iathuh ba ka kam ban tih ia ka nongrim ban pynieng paia kala sdang bad nangne pat kan poi sha ki bynta kiba shadien jong ka Shnong Umsyiem”.
 Bah Prestone Tynsong ha ka sngi Nyngkong, ula ong, ba kam long kaba iahap ban shu kynnoh beit thik tang ia ki kompani ne kontraktor halor ka jingslem ban shna ia ka surok Shillong-Dawki namar ka jingdon kiwei ruh ki jingeh kiba dei ki daw.){kind=link}