Nongpoh, Nohprah 20: Ki Nongialam ka Umsning Town Dorbar ha ryngkat ki ophisar ka Umsning C&RD Block, hynne ka sngi ba-ar, ki la leit ban jurip ia ka jaka kaba thmu ban pynkynriah ia ka ophis treikam jong ka Block na Nongrim Dewlieh sha Lad Umpih, Umsning.
Lah ban kdew ba ka ophis treikam kaba rim jong u BDO ka Umsning C&RD Block ka dei kaba don ha Nongrim Dewlieh hynrei la thmu ban pynkynriah noh da ki bor ka sorkar jylla hadien ka jingshem ba katei ka jaka ba don ka ophis u BDO ka long ka bym biang ban ai ka jingshakri kaba paka ia ki paidbah namar ka jingthut ha kiba bun ki liang.
Hadien ka jingwad bniah la shem pat ba ka jaka kaba thymmai kaba don ha Lum Umpih, Umsning ka long ka jaka kaba biang bad kaba paka ban tei ia ka ophis thymmai u BDO ka Umsning C&RD Block.
Haba kren bad u Bah Rocky Kylla, u ba dei u Chairman ka Umsning Town Dorbar, hadien ka jingjurip ia katei ka jaka ha Lum Umpih, u la pynpaw, ba kane ka jaka kaba thymmai kan long kaba bit ba biang bha ban tei ia ka ophis u BDO ka Umsning C&RD Block bad kaban pynsuk ruh ia ki paidbah khamtam ki nongialam shnong na ki shnong bapher bapher hapoh kane ka Block namar ka jingjngai jong kane ka jaka ka dei tang kumba 50 meter eiei na u surok National Highway.
Halor ka jingpyrshah na kiba bun ki liang khamtam ki kynhun sengbhalang, u Bah Rocky u la pynpaw da kaba ong, ba ki kynhun sengbhalang kim dei ban don kano kano ka jingsngewpher ne ka jingpyrshah namar ka jingthmu ban pynkynriah ia kane ka ophis na Nongrim Dewlieh sha Lum-Umpih ka dei na ka bynta ba kan lah ai ka jingshakri kaba paka ia ki paidbah hi kiba hap hapoh ka jingpeit jong kane ka Block.
U Bah Rocky u la pynpaw ba na ka liang ka Umsning Town Dorbar ka la ai ruh ïaka jingthoh sha u BDO ka Umsning C&RD Block ban kyrshan ia ka jingthmu pynkynriah noh ia ka ophis sha Lum Umpih kaba la ai sngewbha da ka kong Ristila Nongbri kaba don ka jingheh kumba 2 akar.
Ka Kong Victoria Kharnaior, Chairman ka Umsning Block Development and Monitoring Committee, ka la ong ba ka jingshim ia ka rai ban rah noh ia katei ka ophis ka long kaba biang bha na ka bynta ban ai ia ka jingshakri kaba paka sha ki paidbah kiba hap hapoh ka jingpeit jong kane ka Block.
Ka la iathuh ruh, ba ka daw bah ba la shim ia ka rai ban pynkynriah ia ka ophis u BDO ka dei namar kiba bun ki jingbymbiang ha katei ka jaka kaba katei ka ophis ka ieng mynta, kynthup naduh ka jaka pynïeng kali, ka jingbymbiang ka um, ka jingbym ioh ïaka bor internet kaba biang bad kiwei kiwei de kiba ka ophis kam da lah ban ai ïaka jingshakri kaba biang ïaki shnong kiba hap hapoh katei ka Umsning Block.
