35 ngut ki kyrtong kin iakhun na Ri-Bhoi
Nongpoh, Rymphang 08 : Ka Sor Nongpoh hynne ka sngi Balang kala sakhi ia ka jingdheng kali kaba shyrkhei bha ha baroh arliang jong ka surok 4-Lane, namar ka jingiatur paidbah jong ki nongsynran ia ki kyrtong kiba iakhun ia ka elekshon MLA-2023, sha ka Ophis u Deputy Commissioner.
Kane ka jingiamih paidbah ka long ban synran ia ki kyrtong kiba leit sha ka jingshongbishar ia ki kot ki sla thep kyrteng (scrutiny), ban pynthikna ia ka jingioh iashimbynta jong ki ha ka elekshon kum ki kyrtong.
Ka Ophis jong u Deputy Commissioner kynthup naduh ka phyllaw shaduh sha surok bah kala shlei da ki paid nongthep vote kiba la wan synran iala ki jong ki kyrtong na baroh san tylli ki constituency jong ka District.
Ka sor Nongpoh kala khapngiah da ki paidbah bad ki kali kiba wan synran ia ki kyrtong haduh ba kala ktah jur ia ka leit ka wan jong ki kali ha ka surok bah 4 lane, kiba la sahkut ha ka jingdheng kali kaba jur bha ka bym pat ju jia hapoh Nongpoh.
Wat ki kali kit nongpang kila sahkut da ki kynta ha kane ka jingdhengkali.
Hadien ka jingbishar kyrteng, la pynthikna ba haduh 35 ngut ki kyrtong na ki 5 tylli ki constituency, kin iakhun ha kane ka elekshon MLA ka ban long ha ka 27 tarik u bnai Rymphang.
Kat kum ka jingai jingkhein ka tnad Election, haduh 8 ngut ki kyrtong kin iakhun na Umsning, Jirang bad Mawhati Constituency, katba ka Nongpoh ka long 6 ngut bad ka Umroi ka long 5 ngut.
Ka sngi weng kyrteng ba khatduh jong ki kyrtong kan long ha ka 10 tarik Rymphang bad ka jingthep vote kan long ha ka 27 tarik katba ka jingniew vote kan long ha ka 2 tarik Lber.
