Shillong, Nailur 22 : U Nongialam ka AITC bad Myntri Rangbah barim Dr Mukul Sangma ha ka sngi Thohdieng, ula ong ba un sa shong bishar ba hapoh kaei ka kyndon jong ka ain ba la ai ‘Legal Notice’ sha u da u Henry Lalremsanga, u Chairman ka 2B’s Group of Companies.
U Dr Mukul haba iakren bad ki nongthoh khubor, ula pyntip ba un dang ban ioh pdiang ia kane ka legal notice.
“Namar kata, ngan ap ia ka. Ngan sa peit kaba kumno kata ka legal notice bala ai bad kaei kata ka kyndon ain kaba u (Henry) la phah sha nga ia kane ka notice. Ki don katto katne ki kam kiba ki kynhun iasaid ain jong ki kin tip, ngin sa iakhmih bad ki lada poi ka por” ong u Dr Mukul.
Haba kylli la kane ka legal notice ka shong nongrim ban ai pyrshah ia ka hok jong u Dkhot ka Iingdorbar, u Myntri Rangbah arim ula ong “Ta ka daw nga ong ba hapoh ka kyndon ain aiu ba ai ia u (Henry) katei ka lad ban phah sha nga ia ka legal notice”.
Ka legal notice bala phah da u Bah K Kharmawphlang, Legal Counsel ba mihkhmat ia u Henry Lalremsanga, kala dawa ia u Dr Mukul ban panmap khlem kyndon hapoh ka 7 sngi ba kynnoh ia u Henry kum u ‘Kingpin’ khaii droks. Kala dawa ruh ia u Dr Mukul ba un siew ia ka bai pynmynrain khmat ba T. 20 klur hapoh ka 7 sngi ba ioh pdiang ia kane ka notice.
Kane ka legal notice ka dei kum ka sienjam pyrshah ia ka jingkren u Dr Mukul ha ka 19 bad 20 tarik Nailur.
Haba ban biang ba ka jingkren jong u hapoh ka Iingdorbar ka dei tang ka jingai jingmut ia u Myntri Rangbah, u Dr Mukul ula ther pat ia u Myntri Rangbah ba ula rah ia kane ka kam shabar ka Iingdorbar ban ai jingmut ba ka legal notice ka dei ia kaban phah sha u Myntri Rangbah.
“Hapoh ka Iingdorbar, ka jingkren jong ka kala shai bha. Kala long eh kum ka jingai jingmut ia u Myntri Rangbah. Dei tang u Myntri Rangbah uba la kren ia kane shabar ka Iingdorbar. U dei ban phah ia ka legal notice sha u Myntri Rangbah” ula ong.
