Shillong, Lber 27 : U Myntri Rangbah ka Jylla Conrad K Sangma ula thaw record ban kren haduh 3 kynta, 17 minit bad 40 second khlem sangeh haba jubab ia ka jingiatai halor ka mang tyngka ha ka Dorbar mang tyngka jong ka Meghalaya Legislative Assembly hynne ka sngi Nyngkong.
Haba jubab ia ka jingiatai, u Conrad ula ai jubab ia kawei pa kawei ka mat bala kren da ki Dkhot jong ka Iingdorbar halor ka Mang tyngka 2023-2024 bala wanrah da ma u ha ka 23 tarik Lber 2023.
Kane ka jubab u Myntri Rangbah ka long kaba kongsan bha khamtam hadien ka jingmih ka kynrum kynram bala pynmih da ka Liang Pyrshah halor ka jingai por khyndiat eh ia ki Dkhot ban kren. Kaba sngew danda ka long ba u Nongialam ka Voice of the People Party (VPP) Bah Ardent M Basaiawmoit ula jah na ka jaka shong ha ka Liang Pyrshah bad khlem la hap haduh kaba kut jong ka jubab u Myntri Rangbah wat hadien ka jingbyrngem ban mih sha surok halor ka jingai por duna eh ia ki Dkhot.
Ha ka sngi thohdieng, hadien ba la pynsangeh noh ia ka Iingdorbar ha ka por 12 baje shiteng sngi, ka VPP kala ieng ban pyrshah ia kane ka jingpynsangeh bad byrngem ban mih iakhih sha surok halor ka kam ba iadei bad ka roster system namar ka jingaipor duna palat ban iakren ia ki kam shimet jong ki Dkhot.
“Lada ym shah ia ngi ban iashimbynta ha ka Iingdorbar, ngin sa mih sha surok ban iakhun namar kane ka ishu (roster system) ka dei kaba la ktah jur ia kane ka bynta jong ka thain. Kane ka dei ka jingleh ba long pyrshah ia u paidbah (anti people) bad ba pyrshah ia ka Synshar paidbah (undemocratic) bad ka dei ka jingpyrshang jong ka Sorkar ban phetrieh na ka jingbah khlieh” ong u Bah Ardent haba iakren bad ki nongthoh khubor hadien ka Dorbar.
Hynrei, u Conrad ula pynpaw ba ki don bun ki lynti ha kaba ka Liang Pyrshah ka lah ban kren halor kane ka ishu (roster system). Ula ai jingmut ba ki dkhot ki lah ban kren iakane ka ishu ha ka por iatai ia ka jingkren u Lat, jingiatai ia ka mang tyngka bad wat ha ka special motion bad ka jingiatai lyngkot ne short discussion.
Lah ban kdew ba ha ka sngi sdang jong ka Dorbar, ki MLA ka VPP kynthup ia u Nongialam Bah Ardent M Basaiawmoit, kila mih jyndat na ka Iingdorbar ban pyrshah ia u Lat ka Jylla Phagu Chauhan namar ka jingkren da ka Hindi, da kaba ong ba kim sngewthuh Hindi. Hynrei, hadien la paw pyrthei ba ka VPP kala pynmih ia ka election manifesto ha ka ktien Hindi, nalor ka phareng bad Khasi.
Kumjuh ruh, hadien ka jingleh drama ha ka sngi thohdieng, une u Nongialam ka VPP u khlem lah ban ap haduh kaba kut ia ka jubab jong u Myntri Rangbah halor ka mang tyngka watla bun ki dkhot ka Liang Synshar kila shong khleh khih ia palat 3:17 kynta.
Haba kut ka jingai jubab jong u Myntri Rangbah, u Nongialam ka UDP bad Myntri kam Pohiing barim ka Jylla Bah Lahkmen Rymbui, ula pynpaw ba ka jingkren jong u Myntri Rangbah ka dei kaba jrong tam ha ka histori jong ka Iingdorbar bad ka dei ban rung hapoh ka Guinness Book of World records.
