Shillong, Lber 27 : U Myntri Rangbah ka Jylla Conrad K Sangma, hynne ka sngi Nyngkong ula ong ba ka Roster System ka dei ka Rule ba hap ban don haba pyntreikam ia ka State Reservation Policy.
Haba jubab ia ka jingiatai halor ka mang tyngka, u Conrad ula ong ba ka Roster System ka dei kaba khlem pyntreikam ha Jylla ha kine ki 50 snem bala leit bad mynta la hap ban pyntreikam namar ka hukum bala pynmih da ka Iingkashari Meghalaya High Court.
Hynrei ula ong ba ki Dkhot (MLA) ki long kiba laitluid ban iakhun pyrshah ia ka hukum ka Iingkashari . “Kam don jingkhang ia ki ban iakhun pyrshah ia kane ka hukum” ong u Conrad.
Shuwa kane haba iashimbynta ha ka jingiatai, u Nongialam ka VPP bad MLA ka Nongkrem Bah Ardent M Basaiawmoit ula dawa ia ka Sorkar Jylla ban pynsangeh shuwa ia ka jingpyntreikam ia ka Rister System katbym pat dep shong bishar thymmai ia ka Reservation Policy.
Ula ong ba khlem ka jingartatien, ka rai ban buh ia ka bhah ba 40% ia ki Garo bad 40% ia ki Khasi-Jaintia ka dei kaba la leh khlem da pyrkhat bad la shu leh kyrkieh na ka liang ki Nongialam Khasi ban mynjur ia kane ka jingpynbeit bad ka lah ban dei namar ka jingtieng ba ka jingangnud ban ioh Jylla ka lah ban nym urlong lane ki khlem peit ia ka jingiapher ha ka jing don paid.
Haba pynpaw ba ka Reservation Policy ka dei kaba la pynkylla kumba 8-10 sien lyngba ki Office Memorandum (OM), u Bah Ardent ula ong “Nga sngew b aka long kaba donkam kyrkieh ban pynsangeh ia ka jingpyntreikam ia ka Roster System jong ki snem bala leit noh bad ai ba ka Sorkar kan wanrah shuwa da ka Policy ba kham biang. Lada ngi iaid kat kum kane ka policy, kila don ki jingpynkylla kiba ailad ia ki briew ba wan na shabar ban ioh ia ka jingmyntoi”.
“Lada ki Nongialam kiba la leit noh ki lah ban iawan ha kaban thaw ia ka Jylla, balei ki Nongialam na baroh arliang kim iashong lang bad wanrah noh da ka policy ba kham biang” ula ban jur.
Une u Nongialam ka VPP ula ieng skhem ba ka VPP kam long pyrshah ia ka Roster System bad ong “Ngim don ruh ia kano kano ka jingsngew pyrshah ia kano kano ka jaidbynriew. Ngi sngewthuh ba ngi hap ban long phikir bha bad ban da lei phikir kat kaba lah namar ngim kwah ban ktah ia ka jingsngew jong kano kano ka Jaidbynriew”.
