Nongpoh, Risaw 16: Ki paidbah jong ka thaiñ Umdap bad ki shnong bapher bapher ha katei ka thaiñ, kila pynpaw ka jingsngew khia kaba jur halor ka jingsniew shaba palat pud jong ka surok na 20 mer sha Umdap-Shakoikuna, kaba la buh ha ka jingeh ia ka leit ka wan khamtam haka pang ka shitom.
Kumba long mynta ka jinglong jingman jong katei ka surok kala pynsyrtok shisha ïaki paidbah ba leit ba wan namar ka surok kala dap satang da ki thliew ki syar ha shilynter jong ka.
Katto katne ngut ki nongshong shnong kila pynpaw ruh ba kane ka jingsniew ka surok kala pynjynjar bad pynsohsat ïaki paidbah nalor ka jingsniew, ki don ruh ki jaka ba long pung ktieh ba wat ki kali ki shem jingeh ban ïaid.
Kila ong ba kane ka surok ka dei kaba kongsan bha ha katei ka thaiñ bad kaba pynïasoh ruh ia bun tylli ki shnong bad kaba poi ruh sha ki shnong khappud ka Meghalaya bad Assam shaduh ki thaiñ Marmaiñ.
Ki paidbah ka thain kila kyrpad ruh ia ka sorkar bad kumjuh ia ki nongmihkhmat ba kin phai khmat lem sha katei ka surok da kaba pynmang skhim lane ban shna kino kino ki lad ki lynti ban pynbha ïa katei ka surok naka bynta ka jingbit jingbiang jong ki paidbah haka leit ka wan.
