Shillong, Nohprah 03: Katba ka jingianiew vote ka dang iai ha baroh saw tylli ki Jylla, ka Bharatiya Janata Party (BJP) kala jam shakhmat ban ioh ia ka jingjop ha lai tylli ki Jylla napdeng ki 4 tylli kiba dang shu dep thep vote dang shen.
Ka BJP mynta ka dang lamkhmat ha Madhya Pradesh, Rajasthan bad Chhatisgarh bad da ka jingjop ha kine ki lai Jylla, ka party mynta kan synshar marwei ha ki 12 tylli ki Jylla katba ka Congress kaba wan ba-ar na ki National Party ba hehduh hapoh ka Jylla, kan nang hiar sha ka 3 Jylla hadien ka jingliem noh ha Rajasthan bad Chhatisgarh.
Ka Aam Aadmi Party, kaba synshar ha Delhi bad Party, ka dei ka National Party kaba lai ha ka jingioh synshar ia ki Jylla hapoh ka Ri.
Kumba long mynta, ka BJP kala don ha ka bor synshar ha Haryana, Uttarakhand, Gujarat, Uttar Pradesh, Goa, Tripura, Assam, Manipur, Arunachal Pradesh, bad kan ioh sa ha Madhya Pradesh, Rajasthan bad Chhattisgarh hadien ka jingpynliem noh ia ka Congress.
Madhya Pradesh
Kum ka jingwan phai biang sha ka bor synshar ha Madhya Pradesh, ka BJP kala jop 122 seat bad ka dang tam ha ki 64 tylli ki constituency, ka Indian National Congress kala jop 36 seat bad tam ha ki 22 seat katba ka Bharat Adivasi Party ne BHRTADVSIP ka dang jop 1 seat.
Ka elekshon ban jied ia ki 230 ngut ki MLA ka Iingdorbar Madhya Pradesh kala long ha ka 17 tarik Naiwieng tang ha ka shi kylla.
Ha u sne 2018, ka Congress kala jop 114 seat da 40.89 % ka vote share katba ka BJP kala jop 109 seat da 41.02 % ka voce share.
Chhattisgarh
Ka BJP kala lehbha ruh hapoh ka jylla Chhatisgarh bad kat kum ka jingkhein ba ai ka ECI, ka BJP kala jop 26 seat bad dang tam ha ki 28 seat, ka Indian National Congress kala jop 17 seat bad dang tam ha 18 seat katba ka Gondvana Gantantra Party (GGP) ka dang tam tang ha shi seat.
Rajasthan
Ka BJP hangne kala tam ia mar shiteng da ka jingjop haduh 107 seat naka 199 seat. Kat kum ka jingkhein ba ioh na ka ECI, ka BJP kala jop 106 seat bad dang tam shakhmat ha ki 9 seat. Ka Congress kala ioh 60 seat bad dang tam ha 9 seat, ka Bharat Adivasi Party – kala jop 3 seats, Bahujan Samaj Party – ka la jop 2 seats, katba ki MLA shimet kila jop 5 seats bad ki 22 seat ba dang sah, ki dei ki ban dang iai pynbna ia ki nongjop.
Telengana
Ka Congress kala jam shakhmat ban jop ha Telangana ha ka sien ba nyngkong eh kaba pynshaiong ngain ia ka Liang Synshar ka Bharat Rashtra Samithi (BRS), kaba shong ha ka bor synshar ha kane ka Jylla mynta la 10 snem naduh ba pynkha Jylla ba pura.
Ka Congress haduh mynta kala jop 55 seat bad ka dang tam ha ki 9 seat, ka BRS kala jop 31 seat bad dang tam ha ki 8 seat, ka BJP ka dang jop 7 seat bad dang tam tang ha kawei ka seat bad la bud da ka All India Majlis-E-Ittehadul Muslimeen –kaba la jop 3 seat bad dang tam ha ki 4 seat lem bad ka Communist Party of India – kaba la jop 1 seat.
Ka jingniew ia ki vote ka dang iaid shaid shaid haduh mynta bad yn sa pyntip ia ka result ba pura hadien bala dep niew lut ia baroh.
 kala jam shakhmat ban ioh ia ka jingjop ha lai tylli ki Jylla napdeng ki 4 tylli kiba dang shu dep thep vote dang shen.){kind=link}