Lum u DyCM ia ka jingialang ba kyrkieh bad u DC bad SP ka EKH
Shillong, Jymmang 24 : Ki Pulit ka East Khasi Hills, kila pynngat iaki Nongialam ka Hynniewtrep Youth Council (HYC) ha ki kyndon bapher bapher ka Indian Penal Code (IPC) lem bad ka Meghalaya Maintenance of Public Order (MMPO) Act, namar ka jingleit kyndang ia ki Iing jong ki nongshong be-ain ha Lum Survey, Shillong.
Ki Pulit kila register case pyrshah ia ki nongialam ka HYC hapoh Sadar Police Station bad la pynngat ia ki hapoh ka kyndon 143, 144, 145, 147, 148, 149, 151, 152, 153A, 427, 452, 461, 506, bad 120B jong ka Indian Penal Code (IPC) pule lang bad ka kyndon 6 bad 8 jong ka MMPO Act. Hynrei kine ki kyndon baroh ki dei kiba lah ban bah jamin.
U Symbud Myntri Rangbah ka Jylla ba khmih ia ka kam pohiing (police) Bah Prestone Tynsong, ula lum ia ka jingialang ba kyrkieh hynne ka sngi Thohdieng bad u Deputy Commissioner ka East Khasi Hills SC Sadhu lem bad u Superintendent of Police Rituraj Ravi ha Secretariat.
Kat kum ka khubr ba ioh, u Symbud Myntri Rangbah ula pan ia ka kaiphod kaba batai bniah halor ka jingjia ha Lum Survey kaba jia hynnin ka sngi.
Kane ka jingialang, kala iakren ruh halor kiwei ki kam ba iadei bad ka jingshongsuk shongshngain hapoh ka District.
Haba iakren bad ki nongthoh khubor, u Superintendent of Police ka East Khasi Hills ula pynthikna ba la pynngat ia ki Nongialam ka HYC hapoh ki kyndon ka MMPO Act.
Hynrei ula kyntait pat ban kynthoh eiei halor ka jingthmu ban kem ia ki Nongialam ka HYC da kaba ong ba kane ka kam ka dang donkam shuh shuh ia ki jingtohkit. U ong ba ki kyndon kiba la pynngat ki dei kiba la pynshong nongrim kat kum ki kam ba ki leh ha ka jingleit pynpra ia ki Iing ha Lum Survey bad ki jingjia kiba bud.
Ka HYC ha ka sngi Palei, kala leit ban kyndang bad pynpra ia ki Iing jong ki briew ba shong be-ain ha Lum Survey. Kane ka kam kala wan jia hadien artaiew ka jingaipor jong ka seng hadien ka jingiajurip lang ia kane ka jaka bad ki bor pyniaid District.
 Bah Prestone Tynsong, ula lum ia ka jingialang ba kyrkieh hynne ka sngi Thohdieng bad u Deputy Commissioner ka East Khasi Hills SC Sadhu lem bad u Superintendent of Police Rituraj Ravi ha Secretariat.){kind=link}