Shillong, Lber 03: Ka National People’s Party (NPP) kala jied ia u National President ka party Conrad K Sangma kum u Parliamentary Party Leader, ban long biang u Myntri Rangbah ka Jylla.
Ka NPP kala rai ia kane ha ka jingialang jong ki MLA ba thymmai ka party ne ka Parliamentary Party, kaba long hynne ka step sngi thohdieng.
Baroh arngut ki MLA ka BJP ba kynthup ia i Bah AL Hek bad Bah Sanbor Shullai kila iadonlang ha kane ka jingialang. Kumjuh ruh u MLA shimet na Baghmara ula iadonlang ha kane ka jingialang.
Ka BJP hynnin ka sngi kala phah ia ka shithi kat kum ka jingbthah jong u President ka party na Delhi JP Nadda, ban ai jingkyrshan ia ka NPP ba kan thaw Sorkar.
Haba iakren bad ki nongthoh khubor, u National Vice President ka NPP bah Prestone Tynsong ula pyntip ba ka party kala jied ia u National President ban long u Nongialam ka Parliamentary Party.
U National President Conrad K Sangma ula kam ba ka NPP kan leit kam ia ka jingbun paid hakhmat u Lat bad mynta ka kynhun ka don ia ka BJP bad u MLA shimet.
Haba kylli, ula ong ba ka kynhun ban leit kam sorkar kan don palat 32 ngut hynrei um shym treh pat ban iathuh kiei ki party ban wan kyrshan haba ong “Sa peit ynda lah dei ka por”.
Halor ka jingbam smai kum u Myntri Rangbah ka Jylla, u Conrad ula pyntip ba ula khot sngewbha ia u Myntri Rangbah Duh ka Ri Narendra Modi bad ruh ia u Myntri kam Pohiing Amit Shah ban iadonlang ha ka jingpynbam smai.
“Ngi dang ap ia ka jingaiktien na ka Ophis u Myntri Rangbah Duh ban pynthikna ia ka sngi” ula ong.
Hadien kane, u Conrad ula ialam ia ka kynhun ban iakynduh ia u Lat ka Jylla.
Submitted the letter of resignation as Chief Minister of Meghalaya to Hon’ble Governor, Sh. Shri Phagu Chauhan Ji, also staking a claim to form the new Government. pic.twitter.com/Lw1VOSzpfT
— Conrad K Sangma (@SangmaConrad) March 3, 2023
