Shillong, Nohprah 02 : Ka Iingkashari Meghalaya High Court kala bthah ban iapynbeit noh da ka jingiasngewthuh jingmut lang halor ka jingtyrwa ban pynkynriah ia ki 342 tylli ki Longiing na Them Metor kaba don ha Them Iew Mawlong.
Ka Division Bench ba kynthup ia u Chief Justie Soumen Sen bad Justice W Diengdoh ha ka hukum ba pynmih ha ka sngi Ba-ar, kala pynjlan ban shong bishar biang ia kane ka mukotduma ba don bynta hapdeng ka Sorkar Meghalaya bad ka Harijan Panchayat Committee (HPC) haduh u bnai Rymphang 2026.
“Ngi khmih lynti ia mynta ba kan don noh ka jingiapynbeit ba iasngewthuh jingmut lang halor ki jingiakajia baroh” ong ka hukum.
U Advocate General ula pyntip ia ka Iingkashari ba ki jingiakren ki dang iaid ban pynbeit ia ki jingiakajia hapdeng ki liang mamla bad u nongiasaid ain ka HPC ruh ula pynthikna ba ki jingiakren ki dang iaid.
“Lada ka jingiakren kam poi sha ka jingiabeit, ia kane ka mukotduma lah ban shong bishar kat kum ka jinglong jingman” kala ong.
