Shillong, Nohprah 02 : Ka BJP-Meghalaya kala pynrem jur ia ki jingkren u President ka Congress Bah Vincent H Pala bad ong “ka dei ka jingkynnoh ba khlem nongrim bad ba shu mutdur hi”.
Ka BJP kala kynthoh ba ki jingkam u Bah Pala halor ka “One North East” ba ka dei ka buit jong ka BJP ka dei kaba khlem nongrim bad ka bym don satia ia ki sakhi.
“Ka BJP kala synshar ia lai tylli ki Jylla ha ka thain Shatei Lam Mihngi bad ka don ki nongmihkhmat ha ka Sorkar MDA ha ki artylli kiwei pat ki Jylla ka thain. Kum ka party, ngim donkam ia ka jingiasuhbuit, la jied ia ngi ban wan ha ka bor namar ka synshar khadar kaba bha bad ka roi ka par ba kynthup lang ia baroh, ngi la ioh ia ka jingkyrshan u paidbah lyngba ka kam sain hima sima kaba shai, ki kam ki bym ju leh da ka Congress” ong u Nongaiktien ka BJP Bah Mariahom Kharkrang ha ka kyrwoh ba pyllait hynne ka sngi Ba-ar.
Ka BJP ka la shim khia ruh ïa ka jingkynnoh u Bah Pala ba ka party (BJP) kam dei kaba sngewtynnad da ki riewlum ha ka thaiñ Shatei Lam Mihngi, haba kdew ïa ka jingsynshar jong ka ha Arunachal Pradesh bad ka jingdon paid ha Nagaland.
“Kumta ban ong ba ka BJP kam dei kaba sngewtynnad da ki riewlum jong ka thain shatei lammihngi ka dei kaba bakla jur. Ka Congress bad ki dkhot jong ka ki dei ban tip ia ki jingshisha hashwa ban pynmih ia kum kine ki jingkren. Lane ka long kaba palat ban pan na u Rahul Gandhi bad ki paralok jong u?” bynrap u bah Kharkrang.
