Shillong, Nailar 31: U Myntri Rangbah ka Jylla Conrad Kongkal Sangma hynne ka sngi Balang ula ong ba ka Jylla lyngba ka “Progress” Scheme ka iohi jngai ban plie ia ki lad ki lynti ha ka ban pynthikna ba ki nongrep kin ioh ia ka lad kamai kajih lyngba ki kam ri jingri.
Haba pyllait ia ka flagship programme jong ki Nongrep- “Rural Backyard Piggery Scheme” ne ka kam ri sniang ha kyrpong Iing, kaba hap hapoh ka National Livestock Mission ha Byrnihat, Ri-Bhoi, u Myntri Rangbah ka Jylla ula ong baka Sorkar lyngba ki skhim ai jingmyntoi bapher bapher kala lah ban pynioh kamai kajih bad ban kyntiew ia ka ioh ka kot jong ki nongrep.
U Myntri Rangbah ula pyntip ba ka Jylla Meghalaya ka hap ban thied haduh 18,000 MT ka dohsniang na kiwei pat ki Jylla ka Ri bad ka don ka jingduna kaba jur ha ka jingshalan bad jingdawa ia ka dohsniang ha Jylla. “Hynrei lyngba ka skhim ri sniang, ka Jylla ka iohi jngai ban pynbiang ia kane ka jingduna jong ka dohsniang” ula ong.
Haba pyntip ba ia ka flagship programme “Progess” la pynwandur da ka Sorkar ban pynthikna ia ka jingkiew jong ki Long iing longsem lyngba ki kam ri jingri kynthup ka kam ri sniang, ri syiar, ri blang bad kiwei kiwei, u Myntri Rangbah ula ong “Hapoh ka Rural Backyard Piggery Scheme-Phasi-1, ka Sorkar kala mang haduh T. 15.18 klur bad 4 jait ki symbai sniang ki ban sa sam sha ki 6000 tylli ki Longiing”.
U Myntri Rangbah u pyntip ba ka sorkar kan sa nang mang ruh sa T. 25 klur ban pyniaid ia ka wat ba-ar jong kane ka programme.
I am elated to announce Phase 2 of the Rural Backyard Piggery Scheme ‘PROGRESS’- Prosperity of Grassroot families through Livestock Intervention at a financial outlay of ₹25 Crore.@PRupala @Dept_of_AHD pic.twitter.com/SGt8hVqiZ4
— Conrad Sangma (@SangmaConrad) August 31, 2022
Haba phai sha ka Meghalaya Piggery Mission, ka Sorkar Jylla kala ai ram sha ki nongri sniang ba khlem sut ba kin buh ia ki sem sniang. Haduh mynta, ka Sorkar kala ai ram haduh T. 43.67 klur sah ki 250 tylli ki Piggery Cooperative Society.
Ban shim kabu ia ka lad ban kyntiew ia ka kam ri sniang, ka Sorkar kala wanrah ia ka Rural Backyard Piggery Scheme bala bei tyngka da ka Sorkar Pdeng hapoh ka National Livestock Mission bad ruh ka Sorkar Jylla.
Ia kane ka skhim la pyllait ha ka 10 tarkk u Nailar ha Samanda Block, East Garo Hills.
