Shillong, Jymmang 31: Ka Meghalaya kala ioh ia ka kaiphod kaba ai mynsiem ha kaba iadei bad ka jingioh ki khunlung ia ki jingbam tei met, ha kaba ka National Family Health Survey-6 kala pyni ia ka rekod ba hiar ka jingdon ki khunlung ba swai hapoh ka 5 snem na ka 46.5 percent ha ka NFHS-5 sha ka 36.8 percent ha ka NFHS-6.
Kane ka jinghiar ka pyni ia ka jingbteng ki jingshimkhia ka sorkar, ki nongtrei kiba hakhmat eh bad ki shnong ki thaw ban pynkhlain ia ka koit ka khiah jong ki longkmie kiba pun khun bad ki khunlung bad ka jingpynbiang ia ki jingbam ba tei ha kylleng jong ka jylla.
Ka NFHS-6 kala kdew ruh ia ka jingkhlain ha ka jingaibuin ka kmie ia ki khun. “Ka survey kala kdew ia ka jingbiang ha ka rukom aibuin ka kmie, ha kaba 76.4 percent jong ka jingaibuin ia ki khun hapoh ka shi kynta naduh ka jingkha ia ki bad 97.1 percent jong ki khunlung hapoh ka 6 bnai kidei kiba iaid ha ka jingiohbuin na ka kmie” pynpaw ki ophisar ha ka kyrwoh khubor.
Ki ophisar kila pynpaw ba kane ka jinglah kadei namar ka jingdon ki jingpyrshang ban iatreilang kaba kynthup ia ki tnad sorkar, ki nongtrei kiba hakhmat eh ha ka koit ka khiah, ki bor shnong bad ka imlang sahlang kiba iatreilang ban shimkhia ia ka jingbym biang ki khunlung ban bam ia ki jingbam kiba tei bad ka jingnang bha ha ka koit ka khiah na ka bynta ki kmie bad ki khun”.
“Wat hapdeng jongka jingmad ia ki jingtynjuh na ka jinglong jingman ki jaka, ka jinglong riat ki jaka bad ka jingbym ioh bha ia ka jingshakri kaba biang ha ka koit ka khiah ha ki thain nongkyndong, ka Meghalaya suki pa suki kala sdang ban pynkhlain ia ka bynta jong ka jingai ia ki jingbam kiba tei lyngba ki Integrated Multi-Sectoral Programmes bad ki jingtuklar jong ki bor pyniaid shnong” ong ha ka kyrwoh.
Ki nongtrei kiba hakhmat eh kidei ki bynta kiba kongsan bha ban wanrah ia ka jingkylla. “Ki Accredited Social Health Activist (ASHA), Anganwadi Worker bad Auxiliary Nurse Midwive (ANM), kila leh ia ka bynta kaba kongsan bha ha katei ka jingpyrshang, da kaba ai ia ka jingshakri kum ka jingpyniasoh hapdeng ka jingai jingshakri ka sorkar ia ka imlang sahlang” la pynpaw.
Ka Jylla kala pynleit jingmut ha kaban lap kloi ia ka jingbym biang ia ka jingai ia ka bam ka bym biang lyngba ka “Village Health and Nutrition Days (VHND)” ban khmih bniah ia ka jingheh jingsan. “Lah ithuh ia ki khynnah lyngba ka Severe Acute Malnutrition (SAM) bad ka Moderate Acute Malnutrition (MAM) ia kaba la phah pat sha ka Nutrition Rehabilitation Centres ba kin ioh ia ka jingsumar kaba bha bad ka jingkyrshan”.
“La ai shuh shuh ia ka jingkyrshan lyngba ka Home-Based Newborn Care (HBNC) bad Home-Based Young Child Care (HBYC), kaba plie lad ban khmih bha ia ki khynnah kiba shah ktah bad ia ka longiing longsem ka jongki ban bteng ha kaban ioh pdiang ia ka jingiasyllok bad ka jingleit khmih beit beit ha ki iing ki sem”.
Ka jingai jingshakri ia ka koit ka khiah ki longkmie kiba punkhun kadei kaba la pyniasoh lang bad ki jingpyrshang bad ka jingai ia ki jingbam kiba tei ia ki khunlung.
Ka Jylla kala kyntiew ia ka “Early Antenatal Registration, Regular Check-up, Iron and Folic Acid Supplementation, Deworming, Immunisation bad Nutrition Counselling,” katba ki “Scheme Sorkar kiba kyrshan ia ki jingpynkha khun kila nang iai noh synniang ban ioh ia ka jingshngain ha ka rukom kha khun bad ban pynbha ia ka jingseisoh jong ka jingkha khun”.
Ki Anganwadi Centre kila long ki “Paia jong ka jinglong jingman ka jingai ia ki jingbam kiba tei ha Meghalaya, kiba la leit sam ia ki jingbam kiba tei, khmih ia ka jingheh jingsan, ka jingleit skul bad ka jingai jingshakri ha kaban pynsngewthuh ha kaba iadei bad ka koit ka khiah ia ki khynnah, ki longkmie kiba punkhun bad ki kmie kiba ai buin khun”.
La pynpaw ruh ba ka jingshet ia ki jingbam bad ka jingrah sha la iing ia ki rashon kala nang pynkhlain ia ka jingai jingbam kiba tei na ka bynta ki longiing kiba shah ktah”.
Ka jingiashimbynta ka imlang sahlang kala long ka bynta kaba hapdeng jong ka jingseisoh.
“Ki kynhun jong ki longkmie, ki Self-Help Groups, ki nongialam shnong bad ki longiing longsem kila iashimbynta bha ha ka jingkiew jong ka jingkhmih bniah, ka jingai jingpynsngewthuh bad ka jingai jingkyrshan ia ki khynnah kiba shah ktah” kala ong.
Ki prokram kiba la shimkhia da ka jylla ki kynthup ia ka Chief Minister’s Mission 1000 Days. “Kba pynleit jingmut ia ka por ne ka wat kaba kongsan tam naduh ba punkhun haduh ba ki khunlung kin dap 2 snem ka rta, kane ka mishon ka banjur ia ka jingpynkhlain ki nongtrei ka koit ka khiah kiba hakhmat eh ha ka rukom treikam ka jongki, ka jingpynkup bor ia ki kmie, ka jingai jingkyrshan halor ki jingbam kiba tei, ban kyntiew ban shet ia ki jingbam kiba khluid bad ka pylleng bad ban pynthikna ba katei ka jingai jingiarap kaba don ia ka thong na ka bynta ki khynnah kiba mad ia ki jingeh ha kaban heh ban san”.
“Watla ki don ki jingeh, ka jingkiew shaphrang ka Meghalaya ka pyni ia ka jingdon ka jingkylla lyngba ka jingshimkhia thikna ka sorkar, ka rukom treikam kaba khlain jong ki nongtrei kiba hakhmat eh bad ka jingiashimbynta pura jong ka imlang sahlang” la pynpaw ha ka kyrwoh.
“Kane ka jingkiew kaba la kdew ha ka NFHS-6 ka ai shuh shuh ia ka jingshimkhia kaban nang pynthymmai shuh shuh ia ka jingiaid lynti ka Jylla ban pynthikna ba man la ki khynnah kin ioh ia ka lad ban heh ban san, ban pule bad ban kiew shaphrang”.
