Kohima, Iaiong, 07: lehse ka long ka khubor kaba sngewtynnad na ka bynta ki nongshong shnong ka Nagaland hadien ba kane ka jylla ka thain jaka lum ka la ioh pdiang ia kiba bun ki jingtyrwa bei tyngka ki ba kot haduh T. 4,510 na ka bynta ki jingtreikam bapher bapher hadien ka jingkut noh jong ka jingiakynduh lang kaba lai sngi jong ka kynhun B2B bad B2G kaba hap hapoh ka India’s G20 presidency ha Nagaland ha kane ka sngi Palei ba la lah.
Kane ka jylla ka la ioh pdiang ia ki jingtyrwa na ki kynhun kiba dei na ki bynta jong ka ri bad na shabar kumjuh lyngba ki nongmihkhmat kina la wan iashim bynta ha kane ka jingiakynduh lang jong ka B20 ha Kohima.
Ha kane ka jingiakynduh jong ka B2B bad B2G la sakhi halor ka jingiasoi ia ka Memorandum of Understanding (MoU) hapseng ka sorkar Nagaland bad ki kynhun bei tyngka ka ba kot sha ka T. 1,000 klur halor ki kam sam bording na ka bynta kine ki laisnem ki ban wan, ong u heh sorkar lyngba ki lad pathai khubor.
Ki nongmihkhmat na ki kynhun khaii pateng ka Nagaland kumjuh na ki tnat sorkar ruh ki la iashim bynta shitrhem ha kane ka jingialang iamir jingmut ba la tip kum ka Beusiness to Business (B2B) and Business to Government (B2G) ba la pynlong ha ryngkat ka jingiatreilang bad ka Confederation of Indian Industry (CII).
Katkum u heh sorkar, ki la don ruh shibun kiwei pat ki jingtyrwa kam khaii pateng ki na kot sha ka T. 2,000 klur, kata ha kaba iadei ha ka liang ka rep ka riang, ki kam karkhana rit, rep diengjri MSME, medical tourism, sports and IT sector bad kiwei pat.
