Aizawl, Naiwieng 10 :Ha kawei na ki jingjop ha ka thma pyrshah drok ha ka thain shatei lammihngi (Northeast), ki bor pahara shipai ka Assam Rifles bad na ka tnat Anti-Narcotics jong ki pulit ka Mizoram kila ioh ban kurup haduh 70,000 tylli u drok methamphetamine tablets nalor u heroin.
Kitei ki bor pahara hadien ba kila ioh jingtip halor ka jingthmu kam khaii drok beain, kumta ruh kila pynlong ka jingpynap shrip ha ka thain ba pajih ka jylla ha Sialsuk ha ka 8 tarik mynta u bnai hadien ba kila sakhi ia kawei ka kali kaba kila suba jur.Hadien ba kila pyneng kila pynlong ka jingtalasi ha kaba kila lapdien ia une u drok methamphetamine tablet uba don ia ka jingkhia kaba 6.37 kilo.
Ym tang katta ki bor pahara kila ioh kurup ruh ia u drok heroin uba don ia ka jingkhia kaba 342 gram ia kiba la thep ha ki 25 tylli ki jingsop sabon.Haba khein kyllun ia kine ki drok ba la ioh kurup kila kot sha kumba T. 20 klur ha ki jaka iew beain jong ka pyrthei.
Ha kaba iadei bad kane ka jingjia na ka liang ki bor pulit kila ioh ruh ban kem noh ia arngut ki briew kiba la shah kynnoh khaii drok beain.Uwei napdeng kiba la shah kem u dei u nongniah jong ka kali.Ia kine ki briew kiba la shah kem la tip kyrteng kum u Lalhim Puiya bad u Changchunga kiba dei napoh Lawngtlai District ka Mizoram.
Lah ban kdew ba ki bor pulit ka Mizoram ha ka 21 tarik u bnai ba la dep kila ioh ban kurup ia u drok uba shongdor haduh T.28 klur.Ha kaba kum kane ka jingleit khynra ha u bnai Nailur ba la dep ki bor pahara kila ioh ban kurup ia u drok uba shongdor haduh T.84 klur na ki bynta jong ka Champhai district.
