Guwahati, Risaw 11: Ki shipai Border Security Force (BSF) ha ryngkat ki pulit ka Assam hynne ka step sngi ba Ar kila ioh ban kurup ia shibun bah u drok heroin napoh kawei ka trok ha ki bynta jong ka Karimganj district ka Assam.
Na ka liang u nongaiktien ki shipai BSF ula ong ba ryngkat ki bor pulit ka Assam kila lapdien ia kawei ka trok kaba thmu ban leit sha Tripura najan New Karimganj Railway Station ha kaba kila ioh ban kurup haduh 9.477 kilo u drok heroin uba shongdor haduh kumba 47.4 klur na kawei ka trok.
Kane ka trok ka dang don ha ka lynti ban leit sha Tripura na Mizoram lyngba ka Karimganj, ong utei u nongaiktien.
Hadien ba la ioh ia ka jingtip kaba bniah, ki dkhot na ka tnat shipai BSF bad ki bor pulit ka Karimganj kila lapdien ia kawei ka trok bad ioh ban kurup noh ia u drok heroin ba la song ha ki 764 tylli ki synduk sabon ia kiba la buhrieh ha ka jaka bala shna kyrpang hapoh ka jaka shong jong u nongniah, ong u heh shipai.
Utei u heh shipai ula ong ba ia u nongniah jong kane ka trok la kem noh bad ka jingtohkit mynta kala iaid shakhmat.
