Nongpoh, Nailar 16: Ka Eastern Ri Bhoi Organic Farmer Producer Company Ltd, hynne ka sngi ba-ar kala ioh ia ka karkhana kaba la tip kum Integrated Processing Unit kumjuh ia ka Organic Outlet ne ka iew dur jhur ba khlem khleh dawai, kaba la tei ha Khapmara, Bhoirymbong, ban pyniaid iew ia ki marrep kiba mih napoh ka thain.
Ia kane ka karkhana bad ka Iew la tei lyngba ka Mission Value Chain Development Phase-I jong ka Tnad Horticulture ha ka jinglut jingsep ba kot T. 35 lak. Ia kine ki jingtei la plie da u MLA ka Umroi Bah George B Lyngdoh ha ka jingiadonlang u Deputy Commissioner ka Ri Bhoi, u BDO ka Bhoirymbong bad kiwei kiwei ki kynrem ki lyndan.
Ha ka jingkren maitphang, u CEO ka Eastern Ri Bhoi Organic FPC Bah Revistar Kharumnuid, ula iathuh, ba ia kane ka kynhun la seng lyngba ka Government of India Scheme Mission Organic Value Chain Development (MOVCDNER) na ka bynta ka thain Lam Shatei Mihngi, Phase-1 bad la rejister hapoh ka Ministry Corporate Affair.
U pyntip ba kane ka kynhun, ka la don haduh 500 ngut ki dkhot kiba dei ki paid nongrep na ki 9 tylli ki shnong kiba kynthup Nongtarian, Umtung, Madan Nonglakhiat, Bangla (Nongtraw), Lumsohpieng, Lumdaitkhla, Khapmara, Mynsain, Pynthor bad ka Umbathiang.
U Bah Kharumnuid u pyntip ba ki marrep kiba pynmih bha da kane ka kynhun ki long kum u sying, synrai, kubi, presbin, sohmynken, riewhadem nalor kiwei kiwei.
U Bah Kharumnuid u la iathuh ruh, ba hashwa ban sdang ia kane ka FPC, bun ki paid nongrep ki la mad jingeh ha kaba ki la hap ban shu die ia la ki mar rep ha ka dor kaba tad khnang ba ki mar rep jong ki kin lait ban duh ne pyut noh bad ki la hap ban shu hun ruh ia ka dor ba la shu pan da ki nongthied tang na ka daw ka jingbym don ia ki jaka buh ia kine ki mar rep.
Hynrei lyngba kane ka skhim kaba la mang ia ka FPC kan long shisha ka jingkyrkhu kaba khraw ia ki paid nongrep ka thain Ri Bhoi Mihngi hi baroh kawei, ula ong.
Haba kren kum u kongsan, u Bah George B Lyngdoh, u la pynpaw ia ka jingkmen kaba khraw ban ia don bynta lang ha kum kane ka sngi kaba kmen jong ki paidbah nongrep ka thain Ri Bhoi Mihngi bad ong ba ka jingdon jong kane ka karkhana b aka iew die marrep kan long shisha ka jingmyntoi kaba khraw ia ki nongrep kiba don ha kane ka kompani.
“Ka MOVCD ka dei ka skhim kaba wan na ka sorkar pdeng kaban kyntiew ia ka kam rep khlem da khleh dawai (Organic) ia kaba la sdang ha u snem 2016-17” ula ong.
Kat kum ka jingong jong u, ka Ri Bhoi District kala don haduh 4 tylli ki FPC bad napdeng kine ki FPC , ka Eastern Ri Bhoi ka dei kaba la paw bad kiew shakhmat ban ai ka jingshakri ne ka jingkyrshan ia ki paid nongrep kiba don hapoh kane ka kynhun ban kyntiew ia ki kam rep katkum ka thong jong kane ka skhim.
