Shillong, Naitung26 : Tang da ki kynta hadien ba ka Tnad Meghalaya Police kala pynmih ia ka “Look Out Notice” ba la phah sha baroh ki Jylla ka Ri, ki Pulit ka Uttar Pradesh kila ioh ban kem noh ia u Nongialam bad MDC ka BJP na Tura u Bernard N Marak hynne ka janmiet uba la phetrieh naduh ka sngi saitjain.
Ia une u Nongialam ka BJP la ioh ban kem na Hapur District jong ka Uttar Pradesh da ki Pulit kane ka Jylla kiba la ai jingtip mar mar sha Meghalaya.
Haba pynthikna ia kane, U Myntri Rangbah ka Jylla Conrad Kongkal Sangma ula ong “U DGP ula phone ia nga bad iathuh ba ia une u briew la ioh ban kem bad mynta yn sa wan ialam noh ia u sha Tura”.
U Bernard Marak ula phet rieh naduh ka sngi saitjain na Tura hadien ka jingkhynra jong ki Pulit ia ka Farmhouse, kaba lam sah ka jingioh kyndang ia ka kam khaii met ha kane ka jaka bad ioh kem haduh 73 ngut ki briew nalor ka jingioh pyllait ia 5 ngut ki Khynnah ba shah set jubor ha kane ka farm.
U Superintendent of Police ka West Garo Hills u VS Rathore ula pynmih ia ka “Look Out Notice” hynne ka step bad la phah sha baroh ki Thanad Pulit ha kylleng ki Jylla ka Ri, ban iarap thwet bad kem lem ia une u Nongialam ka BJP, uba la shah pynngat ha ka kyndon 3/4/5/6/7 jong ka Immoral Trafficking (Prevention) Act 1956.
Ka jingkhynra jong ki Pulit ia ka farmhouse u Bernard kala wan jia hadien ka jingioh pdiang ia ka ejahar na ki bahaiing hasem jong kawei ka Khynnah kaba la kynnoh ba kala shah leh beijot la bunsien ha kane ka farm jong une u MDC.
