Shillong, Lber 25: Ka Dorbar Shnong Mawrah, East Khasi Hills, kala ioh ia ka khusnam kum ka nongjop ha ka 4th Water Sustainability Award (National Award) 2024-25 na ka jingshna ia ka Mawrah Reservoir Project ryngkat ka Sorkar Jylla, ban iakhun ia ka jingkyrduh um namar ka jingkylla ka suin bneng.
Ka Dorbar Shnong Mawrah kala ioh ia kane ka khunsnam ha ka kyrdan Excellence in Participatory Water Management for Enhancing Water Management through Community Participation” bala pynlong da ka The Energy and Resources Institute (TERI) ryngkat bad ka United Nations Development Programme (UNDP), ka Ministry of Jal Shakti (MoJS), ka Department of Water Resources ha Jacranda Hall, India Habitat Centre, New Delhi.
Kane kadei ka sien kaba nyngkong ba ka sienjam kaba la shim da ka Tnad Soil & Water Conservation kan ioh pdiang ia ka khusnam ha kaba iadei bad ka jingpyntreikam ia ka projek da kaba iatreilang bad ka shnong ka thaw bad kane ka khusnam kadei ka jingai jingithuh ia ka jingtrei kaba khlem shongthait jong ka sorkar ban pyntreikam ia ka sienjam kaba iadei bad ka jingkylla ka suinbneng lyngba ka jingiatreilang bad ki shnong ki thaw.
Ka Water Sustainability Awards kadei da ka jingthmu ban pynshlur ban pynurlong ia ka Sustainable Development Goal 6 (SDG -6) halor ka um, da ka lynti ban pynduna ia ka jingpyndonkam palat pud ia ka um da baroh kiba donbyntalang. Kawei na ki mat ban ioh pdiang ia ka khusnam kadei ka jingtreikam bad ka jingdon jingmut jong ka projek (climate resilient water resources management), ka jinglong kyrpang ka jongka sienjam kaba la shim.
Ka kynhun ki nongbishar ka kynthup ia ki riewstad na ka UNDP, MoJS, Niti Ayog, TERI bad kane ka kynhun ki nongbishar kala pynpaw “Ka projek ka Mawrah kadei ka sienjam kaba pynthikna ia ka jingatreilang hapdeng ka sorkar bad ka shnong ka thaw, ha kaban ialeh ban pynneh pynsah ia ka um, kaba iarap ha kaban kyntiew ia ka jingim jong ki paidbah ha ka shnong bad ka jingkongsan kane ka projek ka iaid ryngkat lang bad ka jingseisoh jong ka SDG Goal 6”.
Ha kaba iadei bad ka jingkylla ka suinbneng, ka sorkar Meghalaya da kaba iatrei ryngkat bad ka Asian Development Bank kala tyrwa ban pyntreikam 100 % ia ka Climate Financing Climate-Adaptative Community-based Water Harvesting Project ban pynthikna ba kan don ka jingiashimbynta jong ka imlang sahlang. Kane ka projek kaba kot 62.5 million USD [US$50.00 million (ADB) & US$12.50 million jong ka sorkar jylla kan kynthup ia ka jingshna ia ki 532 tylli ki jingtei jongka Climate Resilient Water Harvesting, ki kam kiba iadei bad ka Command & Catchment Area, ki prokram kiban kyntiew ia ka jingim ki briew, ban pynkhlain ia ki jaka pule, ki prokram ai jinghikai, ka jingpyndonkam ia ki kor ki bor teknoloji ha kylleng ki bynta jong ka jylla.
Ka Sorkar Meghalaya kala dep iasoi ban shim ia ka ram ha u Nohprah 2024 bad ka jingpyntreikam ia ki projek kala sdang ha kylleng ki district. Kane ka projek kan pynkhlain ban iakhun pyrshah ia ki jingeh kiba mih na ka jingkylla ka mariang. Da kaba thaw ia ki jaka pynlang um ha ka jaka kaba 415 Hektar bad ka jingpynlang um kaba kot 12 million cubic meter, lyngba ka jingiatreilang bad ki shnong ki thaw.
 2024-25 na ka jingshna ia ka Mawrah Reservoir Project ryngkat ka Sorkar Jylla, ban iakhun ia ka jingkyrduh um namar ka jingkylla ka suin bneng.){kind=link}