Shillong, Nailar 04: Ka Jylla Meghalaya ka la ioh ia ka mang tyngka ba T.336.62 klur na ka bynta u snem 2026-27 hapoh ka Jal Jeevan Mission 2.0, ong ka Myntri ka tnat PHE Marcuise N Marak.
U Marcuise ula iakynduh ia u Myntri ka Ministry Jal Shakti CR Patil ha New Delhi bad ula aikhublei halor ka jingmynjur ka Sorkar Pdeng iaka mang tyngka naka bynta ka Meghalaya.
“Nga la iakynduh ia u Myntri ka Jal Shakti CR Patil bad nga la pynsngew ia ka
jingsngewnguh kaba khraw jong nga na ka bynta ka jingmynjur ban mang haduh T.336.62 klur na ka bynta u snem 2026–27 hapoh ka JJM 2.0” ong u Marcuise.
U Myntri ula ong ba ia kane ka pisa yn pyndonkam ban pyntreikam ia ka JJM 2.0 ha ka Jylla bad ban pynkhuid ia ki jingsiew ba sahteng jong ki contractor.
“Ka jingmynjur iaka mang tyngka kan kyrshan ia ka jingpyntreikam ia ka JJM 2.0 ha Meghalaya bad ban pynkhuid ym duna ia ka shi bynta na ka lai bynta jong ki bill ba dang sahteng jong ki contractor ba pyntrei iaka skhim JJM. Ia ki Installment kiba hadien ruh yn sa pyllait ha ka por kaba biang ban pynthikna ba ka jingpyntreikam iaka skhim kan iaid beit iaid ryntih” u la ong.
U Marcuise u la bynrap ba ka Ministry jong ka Sorkar Pdeng ka ai khublei ruh ïa ka jingpyrshang jong ka Jylla halor ka jingpynneh pynsah bad ki jingpynkylla ka rukom pyntreikam iaka skhim JJM.
“La sngewnguh ruh ïa ki jingthmu jong ka Jylla haba ïadei bad ka jingpynkylla ka rukom pyntreikam iaka JJM bad ka jingpyrshang ban pynthikna ban pynpoi um dih kaba khuid shaki nong shong shnong” u la ong.
U Myntri ka tnat PHE u la iakren ruh bad u Myntri Sorkar Pdeng halor ka Resubelpara Water Supply Scheme bad ula pan ruh ka jingkyrshan na ka Sorkar Pdeng.
“Nga la pan ruh ïa ka jingkyrshan jong u Myntri Sorkar Pdeng na ka bynta ka skhim Resubelpara Water Supply Scheme ka ban don ka bynta kaba kongsan ha ka ban pynthikna ïa ka jingpynbiang um na ka bynta ki paidbah ka Resubelpara” ula ong.
