Pynbna ‘Red Alert’ ka IMD ban jur slap ha Meghalaya, Arunachal bad ki bynta ka Assam

Shillong, Nailar 4: Ka India Meteorological Department (IMD) kala pynmih ia ka Red Alert na ka bynta ka Jylla Meghalaya bad Arunachal Pradesh, da kaba maham ba kan don ka jingther u lapbah ha kine ki 24 kynta kiban wan.

Ka IMD kala batai lypa ruh ba kan don ka jingslap jur ha ki katto katne ki district jong ka Assam, kaba la pynmih ia ka jingsngewkhia ba ka lah ban don ka jingshlei um, jingtwa khyndew bad ka jingshah ktah jong ka rukom im jong ki briew.

Katkum ka jingiathuh ka IMD, kan don ka jingslap jur ha kylleng ki jylla jong ka thain shatei lammihngi. Ki District ha Upper Assam bad ki jaka kiba marjan kidei kiba la khmih lynti ban mad ia ka jingther u slap ryngkat bad ka jingdonlang ka eriong erngit.

Ki bor kiba dei khmih kila kyntu ia ki nongshong shnong kiba sah ha ki jaka kiba long them bad ki jaka kiba ju don ka jingtwa khyndew ba kin long kiba husiar. La kyntu ia ki paitbah ba kin kiar ha kaban leit ia kino kino ki jingleit ki bym donkam, khamtam ha ki thain kiba long lum, namar ba ka jingther u lapbah ka lah ban lam sha ka jingwan kynsan ka um, jingtwa khyndew bad ka jingshah khang ka lynti iaid.

Ka State Disaster Response Force (SDRF), National Disaster Response Force (NDRF) bad ki bor pyniaid district kidei kiba la bthah ban long kiba husiar bad ban shimkhia mardor haba don kino kino ki jingjia. Ka jingkiew ka um ha ki wah kadei ruh kaba la peitngor bha na ka jingbteng jong ka jingslap kaba lah ban lam sha ka jingkiew ka um ha ki wah kiba kongsan bad ki wahduid.

Ka IMD kala kyntu ia ki paitbah ba kin bud ryntih ia ki jingpyntip kiba iadei bad ka jinglong jingman ka suinbneng bad ki jingbthah ban shim ia ki lad jingiada kiba la pynmih da ki bor kiba dei khmih.

Haba ka aiom slap kala sdang ban wan ha ka thain, la bthah ia ki nongshong shnong ban shim ia ki lad jingida tad haduh ba ka jinglong jingman jong ka suinbneng kan long kaba biang noh.