Shillong, Rymphang 12: Ka long kaei kaei kaba sngewtynnad ba kawei ka kompani kaba na Meghalaya kala ioh ia ka jingkyrshan tyngka na ki arngut ki nongbei tyngka ha ka Shark Tank India.
Ka Eriweave Pvt Ltd kala ioh ia ka jingkyrshan pisa kaba T.20 lak bad ban bhah 12% na ka jingiohnong ia kine ki nongkyrshan tyngka kiba kynthup ia u Anupam Mittal bad Namita Thapar, ha ka Season 4 jong ka Shark Tank India. Kane kadei ka kompani kaba nyngkong eh na Meghalaya ban ioh ia ka jingkyrshan pisa lyngba ka Shark Tank India.
Ka EriWeave ka dei ka kompani kaba pyntbit ha ki kam suh bad thain ia ki jain Eri Silk ia kaba la leh da ki longkmie.
Ka kompeni ka aiti met bad mynsiem ban kyntiew ia ka roi ka par ha ka imlang sahlang da kaba shna bad kyntiew ia ki jaiñ Eri Silk ba pyndonkam ïa ki ksai kiba ioh na ki khniang ryndia ban shna bad pynmih ia ki jaiñ kiba kyrpang, ki jainkup bad kiwei kiwei. Ka jinglong kyrpang jong ki mar jongki ka shong eh ha ka jingpynwandur kaba long kyrpang bad kaba pher na kiwei pat ki bynta jong ka ri India bad ka jingthain kti ia kaba ki kor ki bor ruh kim lah ban shim ia katei ka jaka.
Ka Shark Tank India ka dei ka prokram kaba pyni ha ka Sony Entertainment Television bad ka Sony LIV. Kaba pyni ia ki nongsengkam kiba pyrshang ban pynheh ne pyniar ia ka khaii pateng ka jongki da kaba pyni ia ki mar kiba ki pynmih ha ki nongbei tyngka, kiba shim pat ia ka rai la ki kwah ne kim kwah ban bei tyngka ia ki mar kiba ki pynmih.
Kumno ka sdang ?
Ha ka shnong Iapngar, ka kam thain ia ki jain ryndia kadei ka kam kaba la leh naduh ki por hyndai hynthai bad kadei ka kam kaba don burom hynrei dei naduh u snem 1970 shaneng ba kane ka kam kaba itynnad jong ka jingthain bad jingsuh ia ki jain ryndia kala sdang iaid bha ha ka shnong Iapngar, ia kaba la wanrah da ka nongiohi jngai ka Kong Kristina Dris Lyngdoh Thaiang kaba hikai bad pynhiar pateng ia kane sha kawei na kiba ioh jinghikai ka Kong Prissila Rymbai, kaba la kylla long kum ka nongtbeh ia kane ka kam.
Kane ka kam kala sdang paw pyrthei ha u snem 2018 na ka jingduna u ksai ban thain ia ki jain kup ryndang ne scarf, kaba la pynlong ia ka Kong Iaishah ban pyrkhat da ka jingtip ba khyndiat kumno ban suh bad thain jain ha ka thain. Da ka jingthmu ban weng ia katei ka jingeh, kala lum ia ka kynhun bad iatreilang bad ka Raid Iapngar Handloom Weaver Cooperative Society. Lyngba kane ka jingkyrshan bad jingiatreilang kala sdang ban paw pyrthei bha kum ka jingiakhih ban pynkup bor ia ki longkmie, ban pynkhie im ia ka kam thaiñ jaiñ bad ban pynkhie im ia ka rukom thain jaiñ kaba naduh ki por kiba mynshwa.
La seng ha u snem 2019, da ka Kong Iaishah Rymbai, ka Eriweave ha kine ki 4 snem kiba la dep, kala kyrshan ia palat 100 tylli ki longing bad wat hapdeng ka jingiakynduh ia ki jingeh, kala lah pat ban kyntiew ia kane ka kam ban pynurlong ia la ka thong ban kyntiew ha ka ioh ka kot jong ka imlang sahlang.
Ha u snem 2022, ka Eriweave kala pyniasoh bad ka PRIME Startup Hub, Shillong bad ka iew ka hat ka jongki ban die ia ki mar kadei ha Shillong bad Delhi bad kila don ruh ki nongthied Online kiba na Mumbai bad na kiwei kiwei ki jylla.
Ki mar kiba iaid iew bha kidei ki tapmoh bad kine kin oh synniang haduh 70% ia ka jingioh lum ia khajna na ka jingdie ka jong ki.
Ia u ksai ryndia la pynmih da ki longkmie naka shnong Iapngar, Ri-Bhoi District, Meghalaya.
Ka PRIME Meghalaya kala pynpaw ia ka jingsngew sarong ia ka Kong Iaishah Rymbai ka nongseng jong ka Eriweave Pvt Ltd kaba la ioh iaka jingkyrshan ban ioh ia ka jingbei tyngka .
“Ka jingïaid lynti ka Kong Iaishah ha ka jingseng kam kadei kaba la ialam da ka mishon ban pynkhie im bad ban pynneh pynsah iaka jingpynmih ia ki jaid kiba la thain na u ksai ryndia ban kyntiew ia ka jingsngew sarong ia ka imlang sahlang ha ka kam thain bad suh ia ki jaiñ tynrai. Wat hapdeng ki jingeh kiba bun, ka jingiohi jngai ka jongka ban pynneh ia ka ioh ka kot lyngba ka jingpynmih ia u ksai ryndia bad ban thain ia ki jain ryndia kala long kaba iai neh. Ka jingiengskhem ha katei ka jingiohi jngai kala long ka nuksa ha ka rukom pynmih ia kiei kiei kiba long thymmai bad kyrpang ha ka Eriweave, ha kaba ki mar kiba ki pynmih ki long ka jingpynshisha ia ka kolshor kaba riewspah jong ka imlang sahlang ka jongka” la pynpaw ka PRIME Meghalaya.
“Ngi iengskhem ban pynlong ïa ka kam ban sengkam kum ka lad kaba ki samla jong ka jylla kin jied ban seng ia ki kam ki jam ki jongki lyngba ka jingthaw ïa ka rukom treikam kaba plie lad ia ki ban ioh ia ka jingkyrshan pisa, ki kor ki bor, ka sap ka phong bad ka jingbtin lynti bad bruh ban ioh ia ka lad ban pyniaid ha ki iew kiba heh” la pynpaw ki heh ophisar ka PRIME Meghalaya.
