Shillong, Risaw 22: Ka Supercare Hospital, Shillong kaba long kawei na ki jaka ai jingsumar kaba pawkhmat haka jylla, dang shen, kala ioh iaka jingithuh na ka National Accreditation Board for Hospitals and Healthcare Providers (NABH).
Ka NABH ka dei ka kynhun jong ka Quality Council of India (QCI), bala buh ban pynlong bad khmih ïa ki Accreditation Programme ne ki programme ai jingithuh ïa ki jaka ai jingsumar. Ka NABH ka dei ka dkhot jong ka International Society for Quality in Health Care (ISQua) bad ki hospital ba ïoh jingithuh na ka NABH ki ïoh jingithuh ha kylleng ka pyrthei.
Ki kyrdan ba buh da ka NABH ki dei mynta ki kyrdan khmih ba biang tam ïa ka rukom treikam ki hospital ha India bad ki don artylli ki kyrdan rukom khmih ïa ki Hospital Allopathic, kawei ka dei ka Full NABH, kaba ïahap ïa ki hospital ba ai jingsumar ba kyrpang ne Speciality bad ki hospital ba sumar kham kyrpang shuh shuh ne ki Tertiary Care, bad kawei pat ka dei ka Entry-Level NABH, kaba khmih ïa ki hospital ba kham rit ki bym don ïa ki jingdonkam ba ïahap bad ka kyrdan Full NABH.
Ka Supercare Hospital kala ïoh ïa ka jingithuh NABH Entry-Level ha ka 5 tarik u Risaw 2021, bad kala ïoh ïa ka jingithuh ba pura, ka Full NABH ha ka 29 Nailur 2022 bad kane ka jingithuh kan treikam haduh ka 30 tarik u Nailur, 2026.
Ka Supercare Hospital ka dei kaba nyngkong bad tang kane hi ka hospital ha Meghalaya kaba ïoh jingithuh kum ka Full NABH.
U nongseng bad Managing Director, u Dr. R. S. Thangkhiew u ngeit ba ka jingioh jingithuh na ka NABH ka pynkhlain ia ka jingiohi jngai jong ka Supercare Hospital.
U Dr. Thangkhiew ula ong ba ka jingithuh daka NABH kadei naka bynta ban buh ia ka rukom treikam ba bha ha ka jingsumar, ka jingpynkoit bad ka jingsuk bad kumjuh ka mat treikam ka hospital.
Ula ong “ ka Supercare ka thmu ban long ka nongtbeh jingshai ha ki rukom sumar ba thymmai, ki lad bad ki jingpyrkhat ba iadei bad ki jingshakri ha ka koit ka khiah, bad ha kajuh ka por kan pynthikna ba ki nongrim ka jingsumar kin long ka bor jong ngi”.
“Kiba wan phah sumar ki dei ki nongioh jingmyntoi bakhraw tam na ka jingithuh Full NABH bad ka Entry-level namar ba ka wanrah ia ka jingsumar ba bha bad ka jingshngaiñ ïa kiba shah sumar. Ki nongpang ki ioh jingsumar na ki nongtrei bala shah hikai pyntbit” la ong u Dr. Thangkhiew.
U Dr. Thangkhiew ula ong ba kane ki jingai jingithuh ia ka rukom treikam ka hospital ki ai jingmyntoi ia ki nongtrei ka hospital namar kin iai ioh jinghikai, ka jaka trei ruh bad ka jinglong nongialam ka kham bha, bad nalor kine, ka jinglong trai ia ki rukom sumar.
