Shillong,Risaw 07 : U Vice President ka KSU samla Pynkmenlang Sanmiet uba shah kem na ki jingjia thombor kiba jia ha ka rally thuk thuk ka seng ha ka 19 tarik Nailar, ula ioh jamin 20 sngi halor ka nongrim ba un leit sumar jingpang.
Ka Iingkashari Additional Session Judge Benzee Laitmon kala pynmih ia ka hukum ha ka sngi Nyngkong, haba pynpaw ba u samla Pynkmenlang u dei uba la phah na Civil Hospital sha Bethany Hospital ban ioh ia ka jingsumar kaba kham bha.
U samla Pynkmenlang ula shha kynnoh haba iadei bad ka Sadar PS Case No. 307(8)2026 bala mudui da magistrate AL Bareh hapoh ka kyndon thmu pyniap briew, pynkulmar da ki tiar pynmynsaw, bad pynjulor ia ki nongkynti paidbah.
Ula don ha phatok naduh ka 19 tarik Nailar haduh ba artylli ki jingkyrpad bah jamin ban leit sumar la kyntait da ka iingkashari CJM.
U nongiasaid ain HR Nath ula iasaid ba u samla Pynkmen u don ia ka jingpang hypertension, epistaxis, deviated nasal septum ryngkat ka ulceration, fatty liver bad dyslipidemia bad u donkam kyrkieh ia ka jingsumar.
U pyntip ruh ba u samla Pynkmen u dei u PhD scholar ka NEHU uba donkam ban aiti ia ka thesis jong u.
U Additional PP J Marak u khlem pyrshah satia iakane ka jingkyrpad halor ka nongrim ka koit ka khiah.
Ia u samla Pynkmen la bthah ban aiti ia ka bond ba T.50,000 ryngkat kawei ka surety, iatreilang bad ka jingtohkit, ym ban leit iakren bad ki briew ba don bynta ha ka case lem bad ban aiti ialade hadien 20 sngi.
