Shillong, Risaw 07: U Myntri Rangbah Conrad K Sangma u la ong ba ka Sorkar jylla ka la buh ia ki police outpost ha baroh ki jaka kiba hap hapoh ka jingpeit ki bor synshar ka Meghalaya kiba don ha shilynter u pud bad ka Assam, bad kiwei pat ki Police Outpost ki dang don ha ka jingpynkhreh.
Haba kyntait ia ki jingkynnoh ba ka Sorkar Jylla kam nud ban pynieng Police Outpost haki thain khappud, u Myntri Rangbah ula ong “Kata ka long kaba bakla jur bha”.
“Ha baroh ki jaka ba hap haka jingpeit ki bor synshar ka Meghalaya, ngi la buh ia ki outpost. Don kiba dang iaid shakhmat, ha ki katto katne ki jaka ngi wad briew ban buh iaki Out Post, ha ki katto katne ngi dang wad iaki jaka bad ha ki katto katne ngi la dep sdang iaki Out Post,” u la ong.
U Myntri Rangbah ula bynrap, “Ngi la buh bun ki Border Outpost bad ngi dang buh shuh shuh. To ngeit skhem, ngin pynthikna ba ha kine ki jaka baroh kiba don hapoh ka jingpeit ka Sorkar Meghalaya, ngin shim ïa ki sienjam ban pynbiang ïa ka jingïada ïa ki nongshong shnong.”
