New Delhi, Jylliew 09 : Katba u Narendra Modi u dang pynkhreh ia ka jingbam smai kum u Myntri Rangbah Duh ka Ri ha ka sien kaba lai, ki jingiamutdur mano ban ioh ia ka shuki Myntri kala jur bha mynta.
Lada dei ban iakren ia ka jingioh shuki Myntri na ki Jylla ka thain Shatei Lam Mihngi, ha kane ka kynti ba mynta, imat tang lai ngut kin ioh ia ka shuki, kaba long jan mar shiteng na kaei kaba ioh ha ka Sorkar Modi 2.0.
Kat kum ka khubor, u MP ka Lok Sabha na Dibrgarh, Assam Sarbananda Sonowal, u MP ka Rajya Sabha bad u Press Advisor u Myntri Rangbah ka Assam Patriba Margherita, ki dei kiba la thikna ban ioh ia ka shuki Myntri.
Nalor kine, u Kiren Rijiju, MP ka Lok Sabha na Arunachal Pradesh West, u lah ban shah kynthup lang ha ka kynhun Myntri ba thymmai, ong ka khubor.
Baroh kine ki MP kila leit iashimbynta ha ka jingkhot dih sha ha iing sah u Narendra Modi shuwa ka jingiathaw Sorkar, ka ban long mynta ka janmiet.
