Shillong, Lber 06: Ka Khun Hynniewtrep National Awakeining Movement (KHNAM) kala pynpaw ba ka seng kan ïeng ban pyrshah jur lada pyntreikam iaka Uniform Civil Code (UCC) wat lada hap ban mih ha surok.
“Lada pyntreikam ia ka Uniform Civil Code kan ktah ia ka hok jong uwei pa uwei u nongshong shnong jong ka Ri India kumba la ai bor da ka Riti synshar ka Ri India, khamtam eh iaka hok long trai jong ngi ki rit paid. Ka Ri India ka dei ka Ri kaba don bunjait ki niam, bun jait ki kyntien iakren bad bun jait ki riti dustur bad ka UCC kan pynklumar lut ia baroh ki jingiaid beit iaid ryntih ha ka Ri baroh kawei bad ka lah ban wanrah ka ia jingiaumsnam ruh” la pynpaw u General Secretary ka KHNAM u Bah F Marpna haka kyrwoh khubor.
Ula pynpaw ba ka Jylla Meghalaya kala dei lypa ka jylla kaba shah ktah bha ha ka jingioh lad jong ki paid rithor ban rung kyrthep shapoh ka jylla bad lada la pyntreikam ia ka UCC ka jingma kaba khraw kala ap lupa ia ka jaitbynriew rit paid.
U nongialam ka KHNAM ula pynkynmaw ba u National President ka National People’s Party (NPP) bad u Myntri Rangbah ka Jylla Conrad K Sangma ha ka 7 tarik u Kyllalyngkot 2023, ula ong ba ka Uniform Civil Code (UCC) ka dei kaei kaei kaba ym lah satia ban pdiang da ka NPP bad mynta ka seng kan peit, la u Conrad Sangma bad ka NPP ka ieng pyrshah iaka UCC ne u shu kren tang kum ka jingpynbeij elekshon ia u paidbah.
Ka KHNAM kala kyntu iaki nongmihkhmat ba dang shu shah jied ha u paidbah ba kidei ban ieng ban iada ia ka jylla na ka UCC ym ban shu long niañgkohnguh ha ki jingbthah ka seng BJP.
U Bah Marpna ula pynpaw, ba watla ka Sorkar India kala pyntip lyngba u Myntri kam pohïing ba yn pynteikam noh ia ka UCC, kumta ka seng KHNAM kan ym pdiang satia bad kan iai pyrshah ia kane ka jingthmu wat lada hap ban ia mih surok ruh.
