Shillong, Nailar 27 : U Nongialam ka Congress Bah Ronnie V Lyngdoh, ula iehnoh kam kum u Nongialam ka Liang Pyrshah hapoh ka Iingdorbar Thaw Ain ka Jylla.
Ka Meghalaya Legislative Assembly Secretariat ha ka sngi Nyngkong, kala pynmih ia ka jingpynbna ba pyntip ba u Bah Ronnie ula iehnoh ia ka kam Nongialam ka Liang Pyrshah kaba treikam naduh ka 27 tarik Nailar.
Na ka liang jong u Lamphang Thomas A Sangma, ula pdiang ia ka shithi iehnohkam jong u Bah Ronnie.
U Bah Ronnie V Lyngdoh ula sah marwei kum u MLA ka Congress ha Iingdorbar Thaw Ain hadien ka jingleit iasoh ki 3 ngut ki MLA sha ka National People’s Party (NPP).
Ka Congress kala jop 5 ngut ki MLA ha ka elekshon MLA 2023 hynrei kala hiar sha ka 4 ngut da ka jingiehnohkam u MLA ka Gambegre Saleng A Sangma, uba la jop ia ka elekshon Lok Sabha. Ka jingdon MLA kala nang hiar da ka jingleit iasoh sa ki 3 ngut kiwei pat ki MLA sha ka NPP.
Namar ka jingsah marwei ha Iingdorbar ka Congress kala kylla long ka seng ba rit paid eh ha Iingdorbar katba ka Trinamool Congress kala kylla long kaba bun paid eh ha ka Liang Pyrshah da 5 ngut ki MLA, bud sa ka VPP kaba don 4 ngut ki MLA.
