Nongstoin, Nailar 27 : Ki paidbah ka thain Maweit, West Khasi Hills, kila tylli ha kawei ka sur ba kwah ban sdang noh ka jingtih dewiong kat kum ka jingstad saian lane ka scientific mining ha Pyndengshahlang Coal Block jong u Bah Shining Khardewsaw.
Kane ka sur kala mih na ka public hearing jong ka Meghalaya State Pollution Control Board (MSPCB) kaba long hynne ka sngi Ba-ar ha Sdad Dkhar, West Khasi Hills, kaba la pyniaid da u ADC ka WKH Bah MA Challan ha ryngkat ka jingiadonlang u Environment Engineer ka MSPCB Bah YF laloo bad kiwei kiwei.
Ki Nongshongshnong ka thain Maweit kynthup naduh ki Nongialam Shnong, ki Sengbhalang, ki samla ka thain, kila mynjur da kawei ka sur ba kim don jingpyrshah eiei ruh em ia ka jingtih dewiong kat kum ka jingstad saian ha ka thain.
Ki nongkren ha ka public hearing, kila pynsngew ia ki jingeh ba ki paidbah kila mad mynta la 10 snem naduh ba ka National Green Tribunal (NGT) kala khang ia ka jingtih dewiong thliew khnai hapoh ka Jylla.
“Naduh ba shah khang ka kam tih dewiong, kala ktah ia u khiew jia jong ngi. Kala ktah ia ka pule dangle jong ki Khun ki Kti namar ka jingbym lah kyrshan shuh ki Kmie Kpa” kila pynsngew haba pynpaw ba ki paidbah ka thain kila im hapdeng ka jinghiran bad ki jingeh ba ha rukom ba ki iakynduh ha ka jingim ba manla ka sngi.
