Shillong, Jymmang 03: Ki nonghikai SSA hapoh ka Jylla hynne ka sngi kila ialum lang ha Madan Student Jaiaw ban ioh jingpynshai halor ki rai baka shim haki jingialang bala khot daka Sorkar Jylla lyngba ka Tnat Pule Puthi.
Ha kane ka sngi, ki nonghikai SSA na kylleng ka Jylla ba kynthup kiba don hapoh ka Meghalaya SSA School Association (MSSASA), All Meghalaya SSA School Teachers Association (AMSSASTA) bad ka Meghalaya Fourth Teachers Association (MFTA).
Haba kren shaki lad pathai khubor u President ka MSSASA u Bah Aristotle C Rymbai u la ong ba ki lai tylli ki kynhun nonghikai kila rai ban iatylli lang hapoh kawei ka lama naka bynta ban pynbor iaka Sorkar Jylla ban pynurlong iaki mat jingdawa jong ki nonghikai SSA.
U Bah Aristotle u la ong ba General Meeting bala pynlong mynta ka sngi kadei ban pynshai ia baroh ki nonghikai naki lai tylli kynhun halor ki jingiakren bad ka Tnat Pule Puthi ka Sorkar Jylla.
U la iathuh baka Sorkar Jylla lyngba ka Tnat Pule Puthi kala lum haduh san sien ki jingialang bad ka MSSASA, AMSSASTA bad ka MFTA ban iathir halor ki mat jingdawa khamtam haba iadei bad ka jingioh NOC naki School Managing Committee (SMC) ban aiti pyniaid noh iaki SSA skul shaka Sorkar.
“Kadei kawei naki jingbthah ba kongsan baka Sorkar Pdeng ka bthah shaki Sorkar Jylla ba kam dei ban don ka jingiapher hapdeng ki SSA school bad ki Government School bad ia kane dei ban pynthikna daka ba don beit tang kawei ka SMC kata kadei ban long ka Tnat Pule Puthi ka Sorkar Jylla” la ong u Bah Aristotle.
U Bah Aristotle u la iathuh ba haka jingialang, kala don ruh ka jingiathir halor ka jingtyrwa ka Sorkar Jylla ban pyntreikam daka Meghalaya Education Grant (MEG). “Ka thong jong ka MEG kadei ban kdup lang ia baroh ki skul ba ioh jingiarap naka Sorkar lane ki Grant in- Aid School kum ki Deficit, Deficit Pattern, Adhoc, Fourth Teachers bad kito ki nonghikai SSA ki bym kwah aiti pyniaid iaki skul shaka Sorkar” u la ong.
“Ka Sorkar kala ai por haduh 31 tarik Jymmang ia baroh ban ai iaki jingai jingmut haba iadei bad ki jingtyrwa baka Sorkar ka thmu ban pyntreikam” u la ong.
