Shillong, Kyllalyngkot 17: Ka Gujarat University (GU) bad ka North-Eastern Hill University (NEHU), kila iatreilang ha kaban rakhe ia ka National Startup Day (16 tarik u Kyllalyngkot) da kaba wanrah ia ka mynsiem jong ka jingiatylli hapdeng ka East bad ka West India.
Ia kane ka jingrakhe la pynlong ha GU Maharshi Sushrut Auditorium ha Ahmedabad bad ha kane ka prokram la pyni ia ka bor jong ka jingpynkylla dur ia ki jaka pule, ki buit treikam kiba thymmai bad ka kolshor kaban pyniasoh lang ia kitei ki thain jong ka ri.
Kane ka jingialang kaba don ia ka mat ne ka Theme “Sustainable Innovations in Natural Farming and Agribusiness: Bridging Cultures and Practices,” kadei ka maitphang da ka NEHU BioNEST BioIncubator (B3I) ryngkat ka jingiatreilang bad ka Indian Institute of Sustainability Meghalaya (IISM) bad Gujarat University.
Kila don 200 ngut ki nongiashimbynta kiba kynthup ia ki samla pule, ki nonghikai bad ki nongsengkam lajong bad ha kane ka jingialang la pynpaw shai kdar ia ka jingkongsan ban don ia ka jingiatreilang na ka bynta ban iaid shaphrang ha ka rukom trei bad ka kam khaii pateng ha kaba iadei bad ka rep ka riang.
Ka Dr. Neerja Gupta ka Vice-Chancellor jongka Gujarat University, kala banjur ia ka jingdonkam ban don ka jingiatylli hapdeng ki thain na ka bynta ban don ka jingkiew shaphrang ha ka roi ka par bad ban don ka jingiadei kaba iajan hapoh ka ri.
Kala iaroh ia kane ka jingiatreilang ba ka long kum u mawjam ha kaban kyntiew ia ka jingsam ia ki jingtip bad ia ka jingstad bad ka jingseng kam lajong watla ki don ia la ka kolshor kaba iar.
Lah io hruh ia ka jingkren na u Dr. B. K. Mishra na ka NEHU BioNEST bad u Prof. C.N. Pandey jongka IIT Gandhinagar kiba la kren halor ka jingwan ka jingkylla ha ka rep ka riang bad ia ki jingeh kiba mad na ka bynta ban pynneh pynsah ia ka rukom rep tynrai.
U Dr. Subrota Hati jongka Kamdhenu University ula kren ha kaba iadei bad ka Bioactive Peptides, katba u Kalpesh Parikh na ka GLPC ula kren halor ki lad kiba iadei bad ka Agritech Industry bad la ioh ruh ia ka jingkren na u Prof. Ranjan Ghosh na ka IIM Ahmedabad bad u R.C. Upadhyay na ka IIS, Gujarat University.
Ki samla pule na kitei ki ar tylli ki skulbah kila pynsngewtynnad ia ki nongiashimbynta da kaba pyninam ia ki jingrwai, ka jingtem bad ki poitri kaba pyni ia ka jingriewspah ka ri ha kaba iadei bad ka kolshor bad ka jingpynshlur ban burom bad ban ia rakhe lang kum shipara.
Ka kynhun jong ka NEHU kala leit ruh ban jngoh ia ka Gujarat Biotechnology University, Gujarat Vidyapeeth bad ka IIT Gandhinagar.
Hynrei kaban sah jingkynmaw, kadei ka jingiasoi ia ka MoU hapdeng ka IISM bad ka Dr. Skill, da kaba pynleit jingmut ha kaban ai jinghikai kyrpang ha kaba iadei bad ka sap ka hong kaba iaid ryngkat bad ka ‘Vision of Bharat@2047’.
U Sudhanshu Jangir u Director ka IIS jongka Gujarat University, ula pynpaw ba kane ka jingiatreilang ka long kum u mawjam ban wanrah ia ka lawei kaba neh, kaba iahap ruh bad ki jaka pule bad ka jingseng kam lajong bad ban iakhun ia ki jingtynjuh.
 bad ka North-Eastern Hill University (NEHU), kila iatreilang ha kaban rakhe ia ka National Startup Day (16 tarik u Kyllalyngkot) da kaba wanrah ia ka mynsiem jong ka jingiatylli hapdeng ka East bad ka West India.){kind=link}