Shillong, Naitung 5 : Ka Hills State Peoples Democratic Party (HSPDP) ha ka Central Executive Committee kaba long ha kane ka sngi Ba-ar ka la iatai sani slem bha halor ka Reservation Policy lane ka bhah thungkam thungkam ha ka jylla.
Na ka liang u President ka Party, K.P. Pangniang haba kren bad ki lad pathai khubor u la iathuh ba ka mat iatai ba ka party ka iakren ha kane ka sngi halor ka Reservation Policy kadei hadien ba ka Iing Bishar ka la bthah ban pyntreikam da ka Rooster System ha kane ka jylla ha kine ki khyndiat por ba la dep.
“Kumta na ka liang ka party hadien ba ngi la iakren sani bha halor kane ka kam, ngi sngewthuh ba ka don ka jingsngewkhia kaba khraw bha na ka party kaba ju ieng kyrpang eh na ka bynta ki Khasi – jaintia ba kane ka polisi kaba la don mynta la slem slem bha ka la dei ban don da kawei pat ka rukom pyrkhat ban bishar bniah biang pat ia ka,” u la ong.
U President u la ong ruh ba na ka liang ka party haduh mynta kim pat lah ban ong kano kano ruh la kadei ban bishar bniah lane ban ai jingmut sha ka sorkar. “Hynrei ngi la rai na ka party mynta ka sngi ba ngin ia lum bad iatai lang bad ki riewshemphang jong ka ri jong ngi ban iakren sani bha bad hadien ba ngi la dep ban kren sani ngin sa peit la ka i donkam ne em ban bishar bniah biang pat ia ka,”u la ong.
Katkum ka jingong jong u, hadien ba ki la dep ban iathir iatai ki lah ban aijingmut sha ka sorkar jylla lane wat ban buh ha ka mat iakhun elekshon jong ka party ruh.
