Shillong, Naitung 5 : Ka Nangkiew Irat ka la ioh ban pynliem haduh 2-0 kol ia ka Mawkhar ban khur ia ka jingjop kaba nyngkong ha ka lympung ialehkai jong ka Shillong Premiere League hadien ba ka la ioh ban pynliem noh ia ka Mawkhar haka jingialehkai kaba itynad kaba long ha kane ka janmiet ha madan Third Ground Polo.
Ia ka kol kaba nyngkong jong ka Nangkiew Irat ha kane ka sngi la ioh ban thep da u Chanmitre Thma ha ka minit kaba 37 jong ka kylla step katba ia ka kol kaba ar pat jong ka kynhun la ioh ban thep da u Bris Taro ha ka minit kaba 89 jong ka kylla miet.
Haba phai sha ka jingiakhun, dei ka Mawkhar kaba ioh ban tehlakam bha khamtam ha ka kylla step khamtam haba ka ioh ia ka kabu ksiar tang ha ka minit kaba 5 jong ka kylla step lyngba ka free-kick tangba sniewbok ba katei ka bol ba khyrwit da u Arlangky ka la kiew noh sha jrong.
Ka jingialehkai ha ka kylla miet ruh ka la kham shongshit khamtam haba ka Mawkhar ruh ka la iakhun tyngeh ban ioh pyniakhaid tangba katei kam shym la seisoh satia naba ki rangap dien jong ka Nangkiew kim shym la ailad satia.
Dei tad ha ka minit kaba 89 ba ka Nangkiew ka la pynskhem ia ka jingjop da kaba ioh ban thep sa shi kol kaba pynlong artad ia ka kynhun ban kiew sha ka kyrdan kaba saw ha ka miej ia khein poin da ki 5 point.
Ka jingiakhun mynta ka sngi Balang pat kan long hapdeng ka Ryntih SC pyrshah ia ka lahduh ba rim, ka Shillong Lajong ha ka por 4baje janmiet hi.
