Shillong, Naitung 05: Ka Hills State Peoples Democratic Party (HSPDP) ka lakyntu ia ki arngut ki MLA jong ka party ba kynthup ia u Bah Renikton L Tongkhar kumjuh ruh ia u Bah Samlin Malngiang ba kin kyrshan ia ka kyrtong ba pynieng da ka NDA ha ka elekshon President jong ka Ri ka ban sa long shen, ka Droupadi Murmu.
Haba kren bad ki lad pathai khubor hadien ka jingalang jong ka Central Executive Committee jong ka u President ka Party, Bah K.P. Pangniang u la ong ba hadien ba ki la ioh pdiang ia ka shithi na u Bah AL Hek, Incharge Presidential Election ka NDA, kumta mardor na ka liang ka party ka la shim ia ka rai ban bteng ia ka jingiatrei lang kumba ki la treilang baroh shi katta.
“Hadien ka jingkren kaba sani bha ngim sngewphylla shuh namar ngi la treilang naduh ha ka sorkar MDA namar ngi sngewthuh ba ngi donkam ban bteng ka jingiatrei lang shuh shuh ban pynurlong ia ki thong treikam jong ngi sha ka sorkar India,” u la ong.
Shuh shuh u ong ruh ba ki kyrmen skhem ba ki arngut ki MLA jong ka party kin kyrshan lang ia katei ka kyrtong riewlum kumba ka party ka la rai.
“Namar ba ka Regional Democratic Alliance ka dang don kaba mut ba ka UDP bad HSPDP Alliance ruh ka don namar naduh ka elekshon MP ruh ngi treilang ia u kyrtong ka UDP bad kumta haba ngi don ha ka shatri jong ka RDA ngi sngew dei ba kum ka alliance kam kut ba ngi kyrshan tang mangi shi party hynrei ngin don ruh ka jingkynduh lang bad ki halor kane.
