Shillong, Naitung 10 : Ka Sorkar Meghalaya Democratic Alliance (MDA) kala iasoi ia bun tylli ki Memorandum of Understanding (MoU) bad ka NTPC da ka jingthmu ban pynkhlain ia ka jingpynmih bording ha Jylla Meghalaya.
Kane ka jingiasoi MoU kala long ha New Delhi ha ka jingiadon ryngkat u Myntri Rangbah ka Jylla Conrad K Sangma, u Myntri pynmih bording Abu Taher Mondal, u Gurdeel Singh Chairman bad Managing Director ka NTPC Limited bad u Sanjay Goyal, CMD ka MeECL.
Kine ki arliang mamla kila iasoi ia kine ki soskular ba kynthup ia ka Project Management Services (PMS) na ka bynta ka Meghalaya Discom, ka Development of Power Supply Point (PSP) bad ka jingpyntreikam ia ka Floating Solar Project hapoh ka Jylla.
Ka MoU halor ka PMS bala iasoi hapdeng ka Sorkar Meghalaya bad ka NTPC Limited kan pynbeit ryntih ia ka rukom pyniaid bad pyntreikam ia ka Meghalaya Discom, ka ban pynthikna ia ka jingsam bording ba khlem thut bad ruh ban pynjanai ia ka jingshakri sha u paidbah.
Government of Meghalaya and @ntpclimited have signed MoUs for PMS of Meghalaya Discom, Development of PSPs, and Floating Solar in the state.
This collaboration promises to enhance power connectivity and improve the overall power scenario in Meghalaya. #MeghalayaPowerBoost… pic.twitter.com/KlRB9hyRn0
— Conrad K Sangma (@SangmaConrad) July 10, 2023
Kawei pat ka thong ka long ban pynbha ia ka rukom pyniaid kam jong ka MeECL lyngba ka kynhun ki stad ki jhad bad ka jingshemphang jong ka NTPC ha kane ka bynta. Kan lam ruh sha ka jingpyndonkam bha iala ki jong ki nongkynti pynmih bording ka MeECL bad kumjuh ruh ban iakhlieh lang bad ka jingpyndonkam ia ki bor pynmih bording na ka sngi bad ka lyer ba don hapoh ka Ri.
Da ka jingpyndonkam ia ka jingshemphang ka NTPC ha ka rukom pyniaid ia ki project, kane ka jingiatehlok kan iarap ruh ban pynkhlain ia ki jingtei ban pynmih bording bad kan pynduna ia ka jingduhnong ha ka jingtan bording.
Nalor kane, ka MoU ka ban jur ruh halor ka jingbuh ia ka Power Supply Points (PSP) bad ka jingpyntrei ia ki Floating Solar Project ha Meghalaya. Ka thmu ruh ban wad ia ki lad ki lynti ban pynmih bording lyngba ki Hydro project kiba rit.
Kan wad bniah ruh halor ka jingbuh ia ka Pump Storage Plants ka ban pynmih bordong bad ia ka um yn sa tan biang sha ka pung kum ha Umiam khnang ba ia ka um yn lah ban pyndonkam bad iai pyndonkam khnang ban lah pyndap bording haba jur ka jingdawa.
Nalor kane, kan wad ruh ia ki lad ki lynti ha kaban pyntrei ia ka Floating Solar Power Unit ha Umiam bad kiwei kiwei ki Wah.
U Myntri Rangbah ka Jylla Conrad K Sangma ula pynpaw ia ka jingkyrmen halor kane ka jingiatreilang bad ong “Ka jingiasoi ia ka MoU kan iarap bha ha kaban pynbiang ia ka jingpynmih bording hapoh ka Jylla. Ka jingkut jingmut jong ngi ban pynkhlain ia ka jingpynpoi bording ha Meghalaya kala phalang na kine ki sienjam bala shim”.
U Myntri kam pynmih bording Abu Taher Mondal ula ban jur halor ka jingkongsan kane ka jingiatreilang ban weng noh ia ki jingeh ba ka Jylla kala mad ha ka kam pynbiang bording.
Pule lang ia kane: Ap ka Jylla ban jai jai shwa ha Manipur shuwa ban shim rai ia ki samla pule ba wanphai Iing
