Shillong, Naitung 10 : U Myntri ka Tnad Pule Puthu Rakkam A Sangma hynne ka sngi Nyngkong, ula ong ba kam lah ban long ba ka Sorkar kan shim rai halor ka jingdawa ban kyntiew kyrdan ia palat 844 tylli ki skul Adhoc Upper Primary sah ki Deficit system.
Haba iakren bad ki nongthoh khubor, u Rakkam ula ong “Ym tang ki Nonghikai Upper Primary, wat ki nonghikai Lower Primary bad Secondary ne wat ki nonghikai SSA kila dawa ban thungkam pura noh hynrei ia ka sorkar hi, kam lah ban long ba kan shim rai halor kane ka bynta ia mynta hynrei watla katta kum ka Sorkar Jylla ka dang wad ia ki lad ki lynti. Ngi la trei shitom bad nga tharai ba kan bha shibun ban buh ha ka jingmut jingpyrkhat ba haba don hi ka mon, ka lynti ruh ka don bad ngi la jam ha kane ka bynta”.
U Myntri ula ong ba ka jingdonkam pisa ban weng ia ka jingeh jong ki nonghikai ka long kaba bun bun bah. “Wat I calculator barit in ym lah ban ngiam ia ki dak jingkhein hynrei nga ong ba ngi dang iawad ia ki lad ki lynti bad ngin sa pyntip ia kaei ka sienjam ba lah ban shim” ula bynrap.
Ula pynpaw ruh ia ka jingsngewskhem ba kan sa don ka jingseisoh halor ka jingpyrshang jong ka Sorkar Jylla.
Pule lang ia kane: Sha u CM yn phah tuklar ka Myntri halor ka jingdon ki khyrdop lum khajna na ki marrep
