Iasoi MoU ka MECDM bad ka SSC ban pyntyllun ia ka Early Childhood Development Programme

Shillong Iaiong 28: Ka Meghalaya Early Childhood Development Mission (MECDM) hynne ka sngi Baar, kala iasoi ia ka Memorandum of Understanding bad ka Social Service Centre (SSC), ka tnad shakri ia ka imlang sahlang jong ka Archdiocese of Shillong, ban pyniaid shakhmat ia ka Early Childhood Development Programme ha ki 47 tylli ki Parish.

Kane ka sienjam na ka bynta 2 snem kaba la ai kyrteng “Growing Tomorrow: Early Child Development Programme,” ka thmu ban pynrung ia ki jinghikai bad ia ka rukom leh na ka bynta ban kyntiew ia ka jingheh jingsan ki khynnah lyngba ka rukom treikam jong ki balang, khamtam ha kaban poi sha palat 1,000 tylli ki shnong lyngba ki shnad jong ki Parish.

Ia kane ka MoU la iasoi ha Bianchi Hall ha Laitumkhrah ha ka jingdonlang ki heh ophisar sorkar, ki nongialam niam, ki Parish Priest na kylleng ki bynta jong ka Archdiocese.

Kane ka jingiatreilang kala wan hadien ba kala mih ka jingkhuslai halor ka jingbym bit bym biang ka rukom bam ki khynnah ia ki jingbam kiba tei hapoh ka jylla. Ka Meghalaya kala ioh ia ka rekod kum kawei na kiba heh hapoh ka ri ha kaba kala kynjoh 46.5% jong ki khynnah hapoh 5 snem ba kin shah ktah kaba la long palat ia ka National Average kaba tang 35.5%.

Ki heh ophisar kila ong ba kane ka prokram kan pynleit jingmut nyngkong eh ha ki 1,000 sngi ia ka jingim ki khynnah, naduh ba dang pun haduh ban da dap 2 snem, ia kaba la shim ba kadei ka khyllipmat kaba kongsan ban tei ia ka jabieng bad ia ka koit ka khiah.

Lyngba kane ka jingiatreilang, ia kane ka rukom leh jong ka Early Childhood Development (ECD) yn sa kyntiew lyngba ki Parish kaban kynthup ia ki samla, ki kmie, ki kpa bad ia ki bahaiing bahasem. Ia kane ka prokram yn pyniasoh ruh bad ka Pre-Marital Counselling kaban leh da ki phadar da ka jingthmu ban pynsngewthuh ia ki kamram bad ia ka rukom kaba ki kmie ki kpa ki dei ban leh, hashwa ba kin ioh ia ki khun.

Ki bynta kiba kongsan kiban phaikhmat kin kynthup ia ka jingai buin khun na ka bynta 6 bnai, ka rukom ai jingsumar sukher bad ka jingiadonbynta lang u kpa, ka jingrep ia ki jingthung ban kyntiew ia ki rukom ai bam kaba bha bad kiba tei ia ka koit ka khiah, ka jingpynsngewthuh ia ki khynnah ha kaba iadei bad ka jingheh jingsan ki khynnah bad ka jingiadei ka jongki.

U Additional Chief Secretary bad u CEO ka MECDM u Dr. Sampath Kumar ula ong, kane ka sienjam kadei ka jingthmu ban kyntiew ia ka imlang sahlang ban ialam ha ka kam pynroi.

“Kane kam dei tang ka sobjek jong ka sorkar, hynrei kadei ka sobjek jong ka imlang sahlang bad ka balang. Ka balang man la ka taiew ka poi sha ki longiing longsem. Wat ka jingiakren kaba rit ruh bad ki kmie ki kpa ka lah ban thaw ia ka jingkylla kaban neh slem” ula ong.

U Archbishop Victor Lyngdoh ula pdiang ia kane ka jingiatreilang bad ong, ba ka balang ka iohi ia ka jingroi ki khynnah kum ka jingkitkhlieh ia ka imlang sahlang.

“Man la ki khynnah ki long kum ki jingai sngewbha. Ngi dap da ka jingkmen ban iatreilang ha kane ka bynta ban pynthikna ba ki kynnah kin shah saindur da ka burom naduh kaba sdang” ula ong.

U Director ka SSC u Fr. Teiborlang Lyngdoh ula ong, ba kane ka prorkam kadei kaba iaid lang bad ka jingphaikhmat ka kynhun ba kadei ban don ka jingkitkhlieh jong ki kmie ki kpa bad na ka bynta ka bha ka miat jong ka imlang sahlang.

La sdang ia kane ha u snem 2022, ka MECDM kadei ka mishon kaba la bei tyngka da ka Asian Development Bank, da kaba wanrah lang ia ka tnad ka koit ka khiah, ka pule puthi, ka Social Welfare bad ka Rural Development hapoh jong kawei ka jylli treikam.

Ki ophisar kila ong, ba kane ka jingai jingiatreilang ka SSC ka long ka jingpyniar kaba don jingmut ia kane ka mishon ha ki jaka jong ki balang, ban ngam jylliew ha ki shnong ki thaw ban shimkhia ruh ia ka rukom kylla ia ka jinglong jingman.