Shillong, Risaw 19 : Ka United Democratic Party (UDP) kala mad ia ka jingduh nong kaba khraw ha ka sain pyrthei ha ka sngi Nyngkong hadien ba 3ngut na ki 4 ngut ki MLA jong ka, kila leit ban pyniasoh ialade sha ka National People’s Party (NPP).
Da kane, ka jingdon MLA ka NPP ha ka Iingdorbar ba 60 ngut ki dkhot, kala kiew sha ka 36 ngut, katba ka UDP kala sah satang uwei u MLA-kata u President ka Party.
Kine ki laingut ki MLA ki dei u Bah Paul Lyngdoh (West Shillong), Renikton Lyngdoh Tongkhar (Mawkyrwat) bad Nujorki Sungoh (Mookaiaw).
U Bah Paul bad Bah Renikton, kila iakynduh ia u Lamphang ka Iingdorbar Thaw Ain Thomas A Sangma bad aiti ia ki kot ki sla iasoh NPP. U Bah Nujorki um shym la lah ban iadonlang bad ki namar u dang don hapdeng ka jingsumar.
Ia kine ki MLA la synran da u President ka NPP-Meghalaya Bah Prestone Tynsong, National Vice President Bah Sniawbhalang Dhar bad kiwei kiwei ki nongialam.
Haba kren sha ki lad pathai khubor, u Bah Prestone ula ong “Ka jingdon MLA jong ngi kala kiew sha ka 36 ngut. Ngi ieh ha ka jingstad jong u Lampgang ka IIngdorbar. Sngewsih ba u Bah Nujorki um shym la lah ban wan namar ba u leit phah sumar. Ha ki sngi ban wan, un sa iadon lang bad kane ka kynhun. Ngi kyrmen ba u Lamphang un ai ia ka khubor ba bha sha ngi”.
Halor ka jingpynrung dkhot ba pura sha ka party, ula ong ba ka party ka dang pynbeit ia ki jingdonkam baroh bad kan sa pyntip hadien. U Lamphang un sa shong bishar mynta ia ki kot ki sla bad sa ai ia ka rai ba khatduh.
Haba kylli halor ka jingbujli Myntri, u Bah Prestone ula pynshai ba kam shym la don satia kano kano ka jingbuh kyndon lypa.
“Kam dei halor ka nongrim ka jingai shuki Myntri. Kumba u Bah Paul ula pynpaw, ka jingiasoh NPP ka mut ba ki don katto katne ki jingeh kaba ki sngew ba ka NPP ka lah ban pynbeit. Ka jingkylli kam mih satia halor ka shuki Myntri. Kam shym don kano kano ka jingbuh kyndon lypa” ula ong.
Haba kylli ba u MLA ba marwei ka UDP (President) un dang dei ban bat ia ka shuki Myntri, u Bah Prestone ula ong “Phi lah ban kylli ia kata ka jingkylli na u President ka UDP. Nga dei u President ka NPP”.
Kane ka jingkylla ha ka sain pyrthei kala wan jia tang da ki taiew hadien ba 8 ngut ki MLA ka UDP kila leit iasoh sha ka BJP, kaba la ioh ia ka jingithuh na u Lamphang ka Iingdorbar Thaw Ain.
