Nongpoh, Nailar 18 : Ki bor pyniaid district ka Meghalaya bad Assam kila iasnohkti lang ban wad ia ki lad ki lynti ki ban lah tehlakam ia ka jingshlei um kaba ju mih man ka por ba jur slap ha surok Jorabat-Khanapara, ka surok kaba pyniasoh ia ki artylli ki Jylla.
Ki bor district ka Ri-Bhoi bad ka Kamrup (Metro), kila iashong jingialang para maki hapoh ka DRDA Hall ha Nongpoh hynnin ka sngi Nyngkong, ban iakren ia ki jingeh ba man ka por bad ban wad ia ki lad ki lynti ban tehlakam ia kane ka jingeh kaba mih na ka jingshlei um.
Ia ka jingialang la pyniaid da ka Additional Deputy Commissioner ka Ri-Bhoi Balakytiew Ranee, katba ia ka kynhun na ka Kamrup (Metro) la ialam da u Additional Deputy Commissioner Raja Baishya. Ki Ophisar na baroh artylli ki district kila iashimbynta ha kane ka jingialang.
Ka surok Jorabat-Khanapara ka dei kaba ju mad ia ka jingshlei um naba set ki nala ha man ba jur u slap, kaba la ktah jur ia ki nongshongshnong ka thain bad ia ki nongleit nongwan ha shilynter ka National Highway. Ki don ki khep, ba bun ki bynta jong ka surok kila ngam haduh ba bun ki kali kila sahkut bad ym long shuh ban iaid.
Ki Ophisar kila iakren ia ki daw kiba don ha lyndet jong kane ka jingshlei um bad ka jingdonkam ia ka jingiatreilang ban lah weng ia ka jingeh ha ka jaka ban shaniah tang ha ki jingpynbeit ba shipor ha ka por slap.
Ki bor district na baroh arliang kila ban jur ia ka jingdonkam ban iatreikam lang kaba jan hapdeng ka Meghalaya bad Assam khamtam ba kane ka jaka ba shah ktah ka dei kaba don ha khappud ki ar jylla.
Ka jingialang kala iakren ruh ia ki lad ban lap ia ki daw tynrai bad ki sienjam kiba donkam ban hap leh khnang ban lah pynduna ia ka jingshlei um ha ka thain.
