Imphal, Nailar 18: Sawphew hynriew ngut ki dkhot jong ka KCP (Taibanganba) ki la pyndem wait hakhmat u Myntri Rangbah ka Jylla Manipur u Yumnam Khemchand Singh ha ka jingïalang kaba la long ha 1st Manipur Rifles Parade Ground mynta ka sngi Ba-ar.
Ki dkhoti ki la aiti 20 tylli ki tiar ialeh, 216 tylli ki kuli bad lai tylli ki tiar pynbthei, kaba long ka sienjam kaba kongsan ban wanphai biang sha ka jingim kum ki riew paidbah.
Haba pdiang sngewbha ia ki dkhot, u Khemchand u la kyntu ia ki ban kiar na ki kam thombor bad ban iashim bynta ha ka synshar paidbah, da kaba ong ba ia ka jingsuk bad ka roi ka par ha Manipur lah ban ioh tang lyngba ka jingiakren bad ka jingiatreilang ha ka synshar paidbah.
Ia ki dkhot kiba la wan pyndem kin hap ban shong ha ka jaka ba la buh da ka sorkar hapoh ka Government of India’s Revised Scheme for Surrender-cum-Rehabilitation of Militants in the North East States, 2018, la ong ki heh ophisar.Kane ka skhim ka ai jingiarap pisa, jinghikai kam bad kiwei kiwei ki jingkyrshan ban pynsuk ia ki ban pyniasoh biang sha ka imlang sahlang.
Ki heh jong ka tnad pahara ki la batai ia kane ka jingaiti kum ka jingkyrshan ia ki jingpyrshang ban iasuk kiba dang iaid shakhmat.Ki la pynpaw ka jingkyrmen ba kan pynshlur ia kiwei pat ki dkhot kiba don hapoh ka seng ban pyndem noh ia ki tiar bad ban wanphai biang sha ka lynti kaba kaba dei.
