Shillong, Dec 15: Ka 29th State Karate Championship 2023, kaba la pynlong daka All Meghalaya Karate-Do Association (AMKA), ha Indoor Stadium jongka Jawaharlal Nehru Sports Complex, Shillong kala sdang hynne ka sngi Thohdieng ha kaba 372 ngut ki nongialehkai kila wan ban iashimbynta.
Ia kane ka jingialehkai Karate kaba ar sngi la kyrshan da ka Directorate of Sports and Youth Affairs, ha kaba 372 ngut ki nongialehkai naduhkiba dang hapohka 10 snem ka rta haduh kiba la heh, kila iashimbynta ha ki kyrdan iakhun ki bapher bapher.
Ia kane ka lympungiakob ialehkai la plie da u Bah Ransom Sutnga, Co-Chairman jongka Meghalaya Industrial Development Corporation Ltd uba long ruh u President ka Mawkhar Sports Club.
Haba ai jingkren ula iaroh ia ka AMKA ia ka jinglah ban pynlong ia ka lympung iakob kaba shongkun bad khamtam haba ka AMKA naduh u snem 1981 kala lah ban sei haduh 200 ngut ki nongialehkai kiba la khur ia ki takma ha ki rynsan iakob haka National Level bad 20 ngut kiba la khur ia ki takma ha ki rynsan kiba la long ha kylleng ka pyrthei bad u kyrmen skhem ba nangne shakhamt ruh kin nangmihshuh shuh ki nongialehkai kiba tbit.
U Bah Sutnga ula aiti ruh iaka cheque sha u President ka AMKA Bah Hunlang Lytan bad General Secretary Bah Ksan Warjri kum ka jingiarap ia kane ka kynhun ba kan pyntyllun shakhmat ia ki kam ban kyntiew ia ka kam ialehkai Karate.
U Working President ka Meghalaya State Olympic Association (MSOA) u Bah John F Kharshiing kum u symbud kongsan ula ai khublei iaka AMKA kaba la pynlong ia kane ka championship bad ula ong ba ka jingialehkai karate kadei kawei na ki jait jingialehkai kaba pawnam bha ha ka jylla.
U Bah Kharshiing ula pynpaw iaka jingsngewsnguh ia ki kmie ki kpa kiba la kyrshan ia la ki khun ban ialehkai ia ka Karate bad kiwei kiwei ki jingialehkai bad ula pynshlur ia ki ba kin pule bniah ia ka Meghalaya Sports Policy ban peit ha kano ka dur kan long ka jingmyntoi ia ki.
Ula pynshlur ruh ia ki Club bad ki Academy ba kin applai ban ioh iaka jingiarap lyngba ka YESS Meghalaya Scheme.
Ia kane ka Tournament la pynlong shi bnai shwa ban sdang ka 5th Meghalaya Games kaban long ha Tura bad ki nongialehkai Karateka kila ioh ia ka jingpynshlur ban shimkabu ia kane ka rynsan iakob kum ka jingpynkhreh na ka bynta katei ka lympung kaba heh.
U Bah Kharshiing ula ong ba ka Meghalaya Games kadei ka jingpynkhreh na ka bynta ka National Games, ia kaba ka jylla Meghalaya kan sa pynlong ha kine ki snem ban wan.
Ha kane ka jingiakob ialehkai Karate kan don ka jingiakhun ha ki kyrdan ki bapher kiba kynthup ia ka Kumite (sparring) bad Kata (demonstration of form) ia kaba yn phiah katkum ka rta bad ka jingkhia ki nongialehkai.
